رَسانک نیوز/ چارشمبے روچ 20 ھُرداد ماہ 1405، بلوچی بندیگی کہ ماں تاریک 28 آبان ماہ 1404، دُزاپ ءِ چیریں ادارھئے سادہ پوشیں ٹولییا آییئے لوگئے سرا اُرش ءَ پد مستریں براتئے ھوری ءَ دزگیر کرتگ ءُ آیی ماں رؤکیں سالئے تاریک 16 اردیبهشت ماہ ءَ بهداشت روڈ ئے انکلاب ءُ آمی آمیدگِس ءِ دومی بهر ءَ پیش کنگ بوتگ، آمیدگِس ءَ پہ آییا پاھو ئے ھُکم بُرّتگ.
رَسانک ءَ اے بلوچئے پجّار «میساک رھمت زاده (ھارکوھی)»، کِساس 18 سالگ، ائید مهمد (اُرپ جان دوست) ئے چُک، دُزاپ ءِ نندوک زانتگ کہ وتی مستریں برات ئے ھوری ءَ «مهدی رھمت زادہ (ھارکوھی)»، 21 سالگ، دزگیر کنگ بوتگ، بلے آییئے برات دزگیر بوھگئے دو ماہ ءَ پد، آجو بوتگ.
رَسانک ءِ ھال سرکنوکانی رِد ءَ، اے بلوچئے پرمندہ ائول سرا ماں آمیدگِس ءِ ششمیں بهر ءَ پول ءُ چار کنگ بوتگ ءُ پدا آمیدگِس ءِ دومی بهر ءَ میساک ءَ پہ «مُھاربه گوں سرکار ئے ھلاپ سلاہ بندیں گلانی بهر بوھگ»، «پہ ایمنی ئے ھراب کنگ ءَ مالی کمکئے دئیگ»، «گوں جارتاکئے شنگ کنگ ءَ، انکلاب ئے وش آتک کنگ»، «پہ ملکئے امنیت ئے ھراب کنگ ءَ شئور ءُ دیوان کنگ»، «ھلاپیں گلانی گونا ھمکاری ءُ گوں آیاں ھور بوھگ» ئے سئوب ءَ پاھو ئے ھُکم داتگ، بید چہ اے ھُکما آیی 800 ملیون جرمانہ ھم کنگ بوتگ.
ھال سرکنوکان ءَ گوَشتگ میساک ماں چیریں ادارھئے دارگجاہ ءَ پہ زور سرا منّینگ بوتگ ءُ سکّ ءَ لٹ ءُ شاپِش کرتگ. پد چہ اشیا کہ آمیدگِس ئے ھُکم پہ آییا سرکنگ بوتگ آییئے زھنی جاور سکّ ءَ نگیگ اِنت ءُ لوگئے مردم پہ آییا دل پریشان اَنت.
پیشترا رَسانک ءِ ھال سرکنوکان ءَ گوَشتگ دُزاپ ءِ چیریں ادارھئے سادہ پوشیں ٹولی ءَ بید چہ سرکار ئے ھُکم ءَ ماں انکلاب روڈ ءَ اے دویں براتانی لوگئے سرا اُرش ءَ پد، آیاں دزگیر کرتگ ءُ ھمیں ادارھئے دارگجاہ ءَ بُرتگ. مهدی شمبے روچ ءَ 8 آزر ماہ ءَ دزگیر بوھگئے دہ روچ ءَ رَند پہ دُزاپ ءِ بندیگجاہ ئے نُهمی نمبر واڈ (سیاسی_امنیتی) ءَ شور دئیگ بوتگ ءُ دو ماہ ءَ رَند چہ اُداں آجو بوتگ بلے میساک داں انگت ءَ ماں ھمیں واڈ ءَ بندیگ اِنت.
Be the first to comment