جالک ءَ نزامی ٹولی ءَ پُرّیگیں لوگییے سرا اُرش ءُ پنچ بلوچی دزگیر کرتگ

رَسانک نیوز/ سئے شمبے روچ 19 ھُرداد ماہ 1405، جالک ءِ شهر ءَ نزامی ٹولی ءَ پُرّیگیں لوگییے سرا اُرش ءَ پد پنچ بلوچی پہ ھژم ءُ لٹ ءُ شاپ ءَ دزگیر کرتگ ءُ چیریں جاگهی بُرتگ.

دزگیر بوتگیں پنچیں بلوچئے پجّار «یهیا رئیسی»، 28 سالگ، شاہ بکش ئے چُک، آروس کرتگ ءُ سئے زھگئے پت، «نزیر رئیسی»، 23 سالگ، لتیپ ئے چُک، «ھادی رئیسی»، 22 سالگ ءُ «مهدی رئیسی»، 20 سالگ، ھر دویں نزر ئے چُک، «اھمد رئیسی»، 19 سالگ، سجّهیں جالک شهر ئے نندوک زانگ بوتگ اَنت.

اسناد میڈیا ئے رِد ءَ، نزامی ءُ امنیتی ٹولییا سباھئے ساھت 4 ءَ ھادی ءُ مهدی ئے لوگئے سرا اُرش کرتگ کہ یهیا، نزیر ءُ اھمد اُداں مهمان بوتگ اَنت۔ نزامی ٹولییا در چہ سرکار ئے ھُکم ءُ بید چہ کسئور ءُ مئیار ئے گوَشگ ءَ پہ ھژم ءُ لٹ ءُ شاپ ءَ آیاں دزگیر ءُ چیریں جاگهی برتگ۔ دزگیر کنگئے وھدا چہ لٹ ءُ شاپ ءَ یهیایا ماں سرا لگّتگ ءُ ٹپّیگ بوتگ.

اے جهمنندانی ھاندان ءُ لوگئے مردمان ءَ گوَشتگ گوں اشیا کہ آیان ءَ باز رَندگیری کرتگ بلے ھچ روژنیں پسّویی دئیگ نہ بوتگ اَنت۔ یهیا ئے جاور ئے بارئوا گوَشگ بوتگ کہ آیی پد چہ درمان ءَ دارگ جاہ ءَ شور دئیگ بوتگ.

داں انگت ءَ دزگیر کنگئے سئوب، آیانی سرا بستگیں بُهتان ءُ دارگ ئے جاگہ ئے بارئوا ھچ پئیمیں ھالی دست نہ کپتگ۔ آیانی بے ھالے سرپدی ءَ لوگئے مردمانی دل پریشانی گیش کرتگ.