شستون ءَ چار مردمئے کُشگ بوھگئے داوا ءَ پد، امنیتی ٹولی ءَ گوں ٹکّر ءَ کُشگ بوتگیں دو مردمئے پجّار زانگ بوتگ/ دو نزامی ھم کُشگ ءُ ٹپّیگ بوتگ

رَسانک نیوز/ یکشمبے 17 ھُرداد ماہ 1405، پد چہ سرکاری ءُ سپاہ ءِ ائیر دستیں میڈیا چُش کہ تسنیم ئے جار ءَ کہ شستون ءَ سلاہ بندیں ٹکّریا چار مردم کُشگ بوتگ، رَسانک ءَ دو مردمئے پجّار درا کرتگ ءُ رَسانک ءِ ھال سرکنوکانی رِد ءَ، یک نزامییے ھم کُشگ ءُ یکی دگہ ٹپّیگ بوتگ.

رَسانک ءَ اے دویں بلوچئے پجّار «جلیل نهتانی»، کِساس 45 سالگ، ھمید نهتانی ئے چُک ءُ آییئے بچک «مهمداُمر نهتانی»، کِساس 24 سالگ، جلیل ئے چُک، ھر دو دُزاپ ءِ چشمہ زیارت «چمّگ» دمگئے نندوکیں مردم زانتگ.

رَسانک ءِ ھال سرکنوکانی رِد ءَ، اے ٹکّر ءَ کہ شپ ءِ ساھت دو ءَ بُنگیج ءُ سباھئے ساھت ھشت ءَ آسر بوتگ، دھاں نزامی ءُ امنیتی کارندگ چہ چیریں ادارہ، سپاہ ءِ چیریں ادارہ ءُ سیمسرانی چاروگیں باسک ءِ ٹولی ءَ بهر زورتگ، کہ اے میان ءَ یک نزامی کارندگی ھم کُشگ ءُ یکی دگہ ٹپّیگ بوتگ.

گوَشنت کہ اے ٹکّر ءَ سپاہ ءِ جهمنندیں باسکئے ٹولی ءَ ھم بهر زورتگ ءُ گمان ایشنت کہ کُشگ ءُ ٹپّیگ بوتگیں نزامی کارندگانی کچّ گیش چہ اشیا ببیت۔ بلے داں انگت ءَ رَسانک اے ھالا تسدیک نہ کرتگ.

ھمیں تَچکی ءَ، سپاہ ءِ زمینی لشکر ئے بُنجاہ ئے جارکَشّ ءَ ماں شستون ءِ برنجینان دمگ ءَ اے ٹکّر ئے بوھگ ءَ منّتگ ءُ بید چہ پجّار ئے گوَشگ ءَ یک نزامی کارمند ئے کُشگ بوھگئے ھال ءَ تسدیکی کرتگ۔ ھمیں وڑا جارکَشّ ءَ گوشتگ: ٹکّر ءَ پد «بازیں سلاہ، ساز ءُ سامان ءُ استارلینک ئے ماھوارگ» دست کپتگ ءُ زپت کنگ بوتگ اَنت.