سرباز ءَ سپاہ ءِ چیئریں ادارہ ءَ بلوچیئے لوگئے سرا اُرش ءَ پد، آئی دزگیر کرتگ

رَسانک نیوز/ چارشمبے 22 بہمن ماہ 1404، سرباز ءِ سرکور ءَ گورناگ دمگ ءَ سپاہ ءِ چیئریں ادارہ ئے سادہ پوشیں ٹولی ءَ بلوچیئے لوگئے سرا اُرش ءَ بید چہ سرکار ئے ھُکم ئے درا کنگ ءُ اے بلوچئے میئار ئے گوَشگ ءَ آئی دزگیر کرتگ ءُ گوں وت بُرتگ، ویلئے دہ روچ ءَ پد داں انگت ءَ آئی ءِ ھچ ھالے سرپد ئے دست نکپتگ.

رَسانک ءَ اے بلوچئے پجّار «مھسن آھورانی»، 19 سالگ، مھمد ئے چُک بُندر ءَ سرباز ءِ گورناگ دمگئے نندوکیں مردمی زانتگ.

رَسانک ءِ ھال سرکنوکانی رِد ءَ، سُہب ساھت شش ءَ چیئریں ادارہ ئے ٹولی گوں دو اسپیتیں پژو پارس گاڑی ءَ گورناگ دمگ ءَ تہا بوتگ اَنت ءُ بید چہ سرکار ئے ھُکم ءَ اے بلوچ ءَ کہ وتی لوگ ءَ آرام کنگ ءَ بوتگ دزگیر کرتگ ءُ چیئریں جاگہے برتگ.

ھال سرکنوکان ءَ گوشتگ: ھاندان ئے رَندگیری پہ آئی ءِ ھالے سرپدئے دست کپگ ءَ سوبیں نہ بوتگ ءُ امنیتی ادارہ آن ءَ روژنیں پسّویی نہ داتگ اے گپّ ءَ لوگئے مردمانی دل پریشانی گیش کرتگ.

گوشگ بیت اے بلوچئے پِت نزور ءُ ناتوان اِنت۔ لوگئے مالی چِست ایئرانی زمہ واری آئی ءِ سرا اَنت کہ گوں آئی ءِ دزگیر بوھگ ءَ لوگئے مردمانی مئاشی جیڑہ گیش بوتگ اَنت۔ بلے داں انگت ءَ آئی ءِ دارگ ئے جاگہ ءُ سرا بستگیں الزام زانگ نہ بوتگ.