مشھد ءَ زھرشانی ئے وھدا، پادلپاش کنوکیں ٹولی ئے تیرگواری ءَ شہدر بریں بلوچی کُشگ بوتگ

رَسانک نیوز/ پنچشمبے 18 دی ماہ 1404 ءِ شپ ءَ، مشھد ءَ ھپت ءِ تیر ئے دمگ ءَ مهلوکئے زھرشانی ئے لگت پاد کنگئے وھدا، چہ پادلپاش کنوکیں نزامی ٹولی ئے تَچکیں تیرگواری ءَ شہدربریں بلوچی ءَ تیر وارتگ ءُ ساہ داتگ.

اے بلوچئے پجّار «مھمد ابدی (ریگی)»، 21 سالگ، مھمدکریم ئے چُک، بُندر ءَ دُزاپ ءُ انّیگیں وھدا مشهد ئے جھمنند زانگ بوتگ، کہ مشھد ئے درسرکاری شہدر برجاہ ءَ مئاشیات ءِ سر رشتگ ءَ وانگ ءَ بوتگ.

سربوتگیں ھال آنے رِد ءَ، شہدر برجاہ ءَ وانوکیں اے بلوچ وتی نزّیکیں سنگت ءِ ھمراہ ءَ پہ زھرشانی ئے مُچّی ءَ گوں جُڑگ ءَ روڈ ءَ شُتگ۔ پادلپاش کنوکیں ٹولی ئے مُچّی ئے سرا تیرگواری ءَ ماں سر ءَ تیر وارتگ ءُ ساہ داتگ.

اے بلوچئے کُشگ بوھگ ءَ پد، ھاندان ءُ لوگئے مردمان ءَ چہ امنیتی ادارہ آنے زُلم ءُ زوراکی ءَ دپّ داشتگ ءُ ھچ نہ گوشتگ. ھاندان ءَ پد چہ ایشی کہ بے ساھیں جون چہ رزوان گلباگ ءِ سرد ھانگ ءَ دست گپتگ، ماں ایمنی ئے تُرندیں جاوراں بید چہ سیاد ءُ مردمانے سہیگ کنگ ءُ بہر زورگ ءَ ھاک آں ایئر داتگ.