اسپهان ئے جندک ءَ چه نزامیانی پدا کپگ ءُ گاڑییے لیٹ ورگ ءَ دو ٹیلکشّیں بلوچ کُشگ ءُ ٹپّیگ بوتگ

رَسانک نیوز/ شمبے 16 آبان ماہ 1405، اسپهان ءَ جندک ئے چیک پوسٹئے نزّیکا گوں اشیا که نزامیانی ٹیلکشّیں گاڑییے پدا کپگ ءُ گاڑییے لیٹ ورگ ءَ پنچ روچ گوستگ، بله داں انگت ءَ کُشگ بوتگیں ٹیلکشّ ئے بے ساھیں جون لوگئے مردمان ءَ دیئگ نه بوتگ، اے ویل ءَ که دوشمبے روچ 11 آبان ماہ ءَ پیش آتکگ یک ٹیلکشّی ءَ ساه داتگ ءُ گاڑییے آ دگه نندوک مردم ٹپّیگ بوتگ.

کُشگ بوتگیں ٹیلکشّئے پجّار «وھید گرگیج»، ابدلگپور ئے چُک، دزاپ ءِ نندوک گوشگ بوتگ. ٹپیگ بوتگیں ٹیلکشّئے پجّار داں انگت ءَ زانگ نه بوتگ.

سربوتگیں ھالانی رِد ءَ، چه نزامیانی ٹیلکشّیں گاڑی ئے پدا کپگ ءَ گاڑییے کنٹرول چه ڈریور ئے دست ءَ در آتکگ ءُ لیٹی وارتگ ایشیئے سئوب ءَ وھید جاھا کُشگ ءُ گاڑی ئے آ دگه نندوک ٹپیگ بوتگ.

وھید ئے سیادانی رِد ءَ، رَند چه اشیا که اے ویل پیش آتکگ نزامی ٹولییا آییئے بے ساھیں جون چه اُوداں برتگ ءُ ھاندان ءُ لوگئے مردم دو روچ ءَ رَند سهیگ بوتگ اَنت. ویل ءَ پنچ روچ گوستگ بله داں انگت ءَ بے ساھیں جون لوگئے مردمان ءَ دیئگ نه بوتگ.

ھال زانتیں ھال سرکنوکان ءَ گوشتگ: نزامی ٹولییا اے ٹیلکشّئے گاڑی پارکینگ ءَ بُرتگ ءُ چارتگ ایوک ءَ دو ھالیگیں مشک ماں گاڑی ءَ بوتگ. وھید که پیشترا وتی پت چه دست ءَ داتگ، په وتی لوگ ئے مردمانی مالی جنجالانی ٹاھینگ ءَ ٹیلئے کَشّگ ءَ دِلگوش بوتگ.