رَسانک نیوز / زی سئے شمبے 16 دی ماہ 1404 ءَ، چھبار ءَ 3 دی ماہ ءِ شپ ءَ بلوچیں چُکّی کہ بے پجّاریں مردمان ءَ آوار جتگ، سیزدہ روچ ءَ پد آجو بوتگ ءُ وتی ھاندان ئے آگوش ءَ پدّتر اِتگ.
رَسانک ءَ دیمترا اے بلوچیں چُکّئے پجّار «اھمد ھاشمزھی»، اَلی ئے چُک ءُ چھبار ئے جھمنند زانتگ.
رَسانک ءِ ھال سرکنوکانے رِد ء، ھماں وھدا کہ اھمد وتی جاڑیں برات ئے ھوری ءَ مهمدی مسیت ءِ پدّئیں ڈکّ ءَ روگ ءَ بوتگ کہ بے پجّاریں مردمان ءَ آئی ءِ سرا اُرش کرتگ ءُ پہ زور آوار جتگ. آوار جنگ ئے وھدا اھمد ءَ کوکار کرتگ ءُ چہ دمگ ءِ مردمان ءَ کمک لوٹتگ، یکی چہ جاہ ءَ اُوشتوکیں مردمان ءَ پہ آئی ءِ کمک ءَ جُھد کرتگ، بلے آوار جنوکان ءَ دیم داشتگ ءُ اے وڑا پہ اھمد ئے آوار جنگ ءَ سوبین بوتگ اَنت.
اے بلوچیں چک ئے آجو بوھگ ءِ وڑ ءُ پیم ءِ باراوا گیشیں ھالی دست نہ کپتگ، بلے آئی ءِ آوار جنگ ءَ شہر ئے مهلوک ءُ جهمنند سکّ ءَ دل پریشان کرتگ.
اے ویل ءَ یک برے پدا، چُکّانی ناامنی ءُ زمہ وارانی اے بابت ءَ ناکامی ءَ پہ یکی چہ مهلوک ئے بُن پدی جیڑہ آں بدل کرتگ. اے ویل ھماں وھدا پیش اَتکگ کہ دیمترا ھم بلوچیں ھاندان آن ءَ، ھاسکار چُکّانی بابت ءَ ناامنی ئے گیش بوھگ ءَ ماراِتگ ءُ اے گپّ رپوٹ ھم بوتگ.
ھمیں وڑا بلوچیں چُکّی کہ آئی ءِ نام ءَ «مهمد ھالکی»، گوَشتگش 20 آزر ماہ ءِ شپ ءَ آوار جنگ بوتگ ءُ آئی ءِ بے ساھیں جون ویل ئے دو روچ ءَ پد چہ شہر ئے کشّ ءُ کِرّ آں دست کپتگ. اے ویلانی برجاہ بوھگ ءُ زمہ واریں ادارہ آنی ھچ سوب مندین ءُ دیم داروکیں گامگیجی نہ کنگ ءَ، جھمنندانے دل پریشانے گیش کرتگ ءُ مارینیت کہ چھبار ءِ شہر ءَ چُکّانی ایمنی ءُ ساہ وت سرا یلاک اَنت.
اولین نفری باشید که دیدگاه مینویسد