مولوی پزل الرھمن کوھی ئے میانجی گری پہ کوش کنوکیں مرد ئے پہلّ کنگ ءُ ھونیں پروندہ ئے سرجم بوھگ ءَ آسر بوتگ

رَسانک نیوز/ 9 دی ماہ 1404 ءَ، کُہنیں اَڑ ءُ جیڑے «ازیم»، بلوچ ھان ئے چُک ءُ «ابدالسلام»، گہرام ئے چُکّئے میان ءَ کہ «ولید» ئے کُشگ بوھگ ءَ ھوار بوتگ، بیست ءُ ھشت سال ءَ پد گوں مولوی پزل الرھمن کوھی ئے میانجی گری ءُ بلوچی رسم ءُ رواج آنے کارمرز کنگ ءَ کُشگ بوتگیں مردمئے ھاندان ءَ وتی ھون پہل کرتگ ءُ بکش داتگ. اے پیم ءَ دمگ ءَ، یکی چہ گرانین ءُ نا آرامیں پروندہ آں آسر بوتگ.

اے دود ءُ رُبیدگ آں گوں جُڑتگین ءُ انسان دوستیں کاروایی ءَ ازیم مولوی پزل الرھمن ئے ھوری ءَ بید چہ لوگئے مردمانی سہیگ کنگ ءُ ھالئے دیگ ءَ، راسک ئے ھاشم آباد دمگ ءَ ولید ئے برات ابدالسلام ئے لوگ ءَ تہا بوتگ اَنت، بلوچی زبان ءَ اے رسم ءُ رواج ءَ «زھم ءُ کپّن»، گوشنت، گوں پہلّی یے درھاست ءِ منّگ ءَ اے جیڑہ ئے پہ ایمنی ءِ سرا گیشّینگ ئے راہ ساپ ءُ تَچک کنگ بوتگ.

اے ھالئے رِد ءَ، ابدالسلام گوں مزنیگی ءُ بلوچے رسم ءُ رواج پتّر ئے رھبند ءَ پہلّی یے درھاست منّتگ ءُ پہ شرپ ءَ دیوان ءَ نشتگ ءُ وتی برات ئے کُشوک ءَ بَکشی داتگ.

گوشگ لوٹیت: اے رازی نامہ ئے بُن پدی دیوان گوں دمگئے کماش ءُ با بہروسہ ایں مردمانی بہر زورگ ءَ پہ سرکاری وڑ ءُ پیم ءَ برجم دارگ بیت، تاں کہ سلاھ کاری سبت ءُ سند بہ بیت ءُ ھم سلاھ دوستی ئے پیگام سماج ءَ شِنگ بہ بیت.