رَسانک نیوز/ 7 دی ماہ 1404 ءَ، بلوچیں 13 سالگیں چُکی، پد چہ ایشی ءَ کہ چہ دکانی ءَ چُنت ٹاپی ءُ شُگلات چِست کرتگ، دمگئے نندوکیں دو مردمان ءَ آئی سکّ ءَ لٹ ءُ شاپ کرتگ۔ چہ ھژمیں لٹ ءُ کُٹّ ءَ چُکّ ءَ زھنی ءُ ماں بدن ءَ نُکس بوتگ.
اے بلوچیں چُکّئے پجّار «آسِپ دہکانی»، 13 سالگ، سیئدمهمد ئے چُک ءُ سرباز ئے شورمیتگ دمگ ئے نندوکیں مردمی زانگ بوتگ.
رَسانک ئے ھال سرکنوکان ءَ گوشتگ: جنوکیں مردمان ءَ گوں لٹ ءُ کابل ئے سیم ءَ اے چُکّ سکّ ءَ جتگ۔ چُکّئے بدن ءِ سرا ایئریں لٹّ آنے پد ءُ نشان آں پہ چُکّئے زھنی ءُ بدنی ایمنی ءِ بابت ءَ دل پریشانے گیش کرتگ اَنت۔ چُکّ ءَ زھنی باز نُکس بوتگ ءُ لٹّ ئے پد ءُ نشاں آئی ءِ جون ئے سرا درا بنت.
ھال سرکنوکان ءَ گوشتگ: آسِپ ءِ ھاندان ءُ لوگئے مردم چہ مالی بابت ءَ ناچار ءُ بزّگیں مردم زانگ بنت، ھمیں سوب ءَ آیان ءَ اے واک ءُ وس نیست اِنت کہ پروندہ ءَ ماں اِنساپ ءِ ادارہ آں رندگیری بکننت۔ گوں اے جاوراں، زوراکی پروندہ ئے بے نتیجگ بوھگ ءَ دل پریشانیاں گیش کرتگ.
ھمیں تچکی ءَ چہ سماجی ءُ راجی جُھد کار آن ءَ درھاست کنگ بوتگ کہ اے ویلئے سرا وتی پد کِرد ءَ بہ دیئنت ءُ گوں سماجی ءُ انسانے ھکّ آنی پُشت واجہی ءَ، چُکّئے ھاندان ءَ پہ آئی ءِ دراہ کنگ ءُ اِنساپ ءَ سر بوھگ کمک بہ کننت۔ پرچی ءَ کہ اگاں اے ناشر کار ھمیں وڑا یلاک دیگ بہ بنت دیمترا، اے ویل پد ماں پدا بیئنت ءُ ناشرکار ھم ایمن بنت.
اولین نفری باشید که دیدگاه مینویسد