چھبار ءَ بے پجّاریں مردمان ءَ بلوچے نوک ورنایی آوار جتگ

رَسانک نیوز / زی شمبے 6 دی ماہ 1404 ءِ سُہب ءَ، چھبار ءَ نُگرھیں پژو 405 گاڑی ئے بے پجّاریں نندوکان ءَ بلوچے نوک ورنایی آوار جتگ. اے ویل سُہب ءِ ساھت ھپت ءَ ھماں وھدا کہ اے نوک ورنا وانگجاہ ءَ روگ ءَ بوتگ پیش اَتکگ ءُ جھمنندانے دل پریشانی ئے سوب بوتگ.

رَسانک ءَ اے بلوچے نوک ورنا ئے پجّار «نیما بلوچزھی»، 16 سالگ، دھمیں کلاس ئے نو دربر ءُ چھبار ئے جھمنند زانتگ.

رَسانک ءِ ھال سرکنوکانے رِد ءَ، چھبار ءِ ھیّام روڈ ءَ بے پجّاریں مردمان ءَ اے چُکّئے دیم داشتگ ءُ پہ زور وتی گاڑی ءَ سوار کرتگ ءُ اِشتاپ ءَ چہ جاہ ءَ در شُتگ اَنت. اے چُکّئے ھاندان ءَ گوشتگ کہ آیاں گوں ھچ کس ءُ ھچ گَلی ءَ اَڑ ءُ جنجالی نیست اِنت ءُ نہ کہ اے ویلئے پُژدر ءَ زاننت ءُ سرپد اَنت.

گوشگ لوٹیت: اے آوار جنگ ھماں وھدا پیش اَتکگ کہ انّیگیں ماہ آن ءَ چہ چھبار ءُ اے دگہ شہر آن ءَ بازیں چُکّے آوار جنگ ءِ ویل رپوٹ بوتگ. اے پیمیں ویلانی گیش بوھگ ءُ زمہ وارانے اے درگت ءَ دلگوش نہ بئیگ ءَ ھاندان آنے دل پریشانی پہ وتی چکانی ایمنی ءَ دو چَنت کرتگ.