بلوچی کہ امنیتی ٹولی ءَ بیست روچ دیمترا دزگیر کرتگ، چہ چھبار ئے بندیگجاہ ءَ آجو بوتگ

رَسانک نیوز/ دوشمبے روچ 24 آزر ماہ 1404 ءَ، «سلمان آسکانی»، نامیں بلوچی کہ ماں تاریک 4 آزر ماہ ءِ شپ ءَ امنیتی ٹولی ءَ چہ چھبار ءِ امام ھمینی روڈ ءَ بے سرکارئے ھُکم ءَ دزگیر کرتگ، کِساس 20 روچ بندیگ بوھگ ءَ پد زمانت ئے سرا چہ چھبار ئے بندیگجاہ ءَ آجو بوتگ.

رَسانک ءَ دیمترا آئی ءِ پجّار «سلمان آسکانی»، 32 سالگ، آروس کرتگ ءُ دو زھگئے پت، بُندر ءَ راسک ئے مورتان دمگئے نندوک ءُ انّیگیں وھدا چھبار ئے جھمنند گوشتگ.

دیمترا رَسانک ئے ھال سرکنوکان ءَ دزگیر بوھگ ءَ پد گوشتگش: چھبار ئے امام ھمینی روڈ ءَ امنیتی ٹولی ءِ سادہ پوشیں کارمندان ءَ بید چہ سرکارئے ھکم ءَ سلمان دزگیر ءُ گوں وت ءَ برتگ، آئی ءِ سوشل میڈیا ئے تاک ءُ اکاونٹ امنیتی کارمندانے دست ءَ کپتگ اَنت.

گوشگ لوٹیت: سلمان ءِ دزگیر بوھگ ءَ پد آئی ءِ واتساپ ئے کانال ءَ کہ سد ءُ سی ھزار پیروَک است اِنت، اَکسی کہ آئی ءِ سرا نبشتگ: اے تاکئے دیم گوں سرکار ئے ھکم ءَ پہ ڈنّ کانودی چِست ءُ ایئر آنے ھاترا دارگ بوتگ.

سلمان ءَ وتی واتساپ ئے کانال ءَ پہ بھت آزمایی ءَ بہر زیروکیں مردمان ءَ نوکیں یاں کہ دست دومی گاڑی، لوگ، ۔۔۔ اِنئام ءُ شاباش ایئر کرتگ۔ بھت آزمایی ءَ بہر زیروکیں مردمان ءَ آئی ءِ ٹاھینتگیں بہاء داتگ ءُ بھت ئے چکّاس ءَ ھور بوتگ اَنت۔ گؤستگیں ماہ آن ءَ چہ بلوچستان ئے بازیں دمگ آں جھمنندان ءَ آئی ءِ بھت آزمایی ءَ بہر زورتگ ءُ کَٹّتگش، لوگ ءُ گاڑی یے واھُند بیتگ اَنت.

«سلمان آسکانے» ئے دزگیر بوھگ ءَ پد، زرباریں بلوچستان ءِ انتزامی سروک ءَ دھوکہ ءُ پَراڈ ئے گروہ ءِ بُنیں مردمیے دزگیریئے ھال بید چہ نامئے درا کنگ ءَ سرکرتگ ءُ گوشتگ: لہتیں چہ جھمنندانے شکایست ءَ پد، پتا پولیس اے گروپ ءِ ھِلاپ پہ دھوکہ، پراڈ ءُ مهلوک ئے رِپینگ ئے وڑیں ناشرکاریانی ھاترا کاروایی کرتگ. اے گوشتانک ءِ رِد ءَ، 53 ملیارد زرّ ئے دیم ماں 13 بانکی ھساب آں دارگ بوتگ ءُ امنیتی ءُ انتزامی ادارہ آں اے گروپ ءِ آں دگہ کارندگ آنے شوہاز ءَ اَنت.