رَسانک نیوز/ شمبے روچ 15 آزر ماہ 1404 ءِ بانگواہ ءَ، سب ءُ سوران ءَ گُنّک ئے سئے راھی ءَ سلاہ بندیں مردمانی دو بلوچئے سرا تیرگواری ءَ یکی کُشگ ءُ یکی دگہ ٹپیگ بوتگ.
کُشگ بوتگیں بلوچئے پجّار «مجید آسکانے»، 26 سالگ، گلام کادر ئے چُک، آروس کرتگ۔ ٹپیگ بوتگیں بلوچئے پجّار «پرزاد سالھی»، 40 سالگ، اھمد ئے چُک، آروس کرتگ ءُ زھگانی پت، دوئیں سب ءُ سوران ئے نندوکیں مردم زانگ بوتگ اَنت.
رَسانک ءِ ھال سرکنوکانی رِد ءَ، یکی چہ مجید ئے سنگتاں پئون جتگ ءُ آئی ءَ پہ گندوک ءَ لوٹتگ۔ مجید گوں پرزاد ءَ پہ ملاکات ءَ ٹاھینتگیں جاگہ ءَ در کپتگ۔ راہ ءَ نیسان باری گاڑی ئے سلاہ بندیں نندوکان ءَ آیانی سرا تیرگواری کرتگ۔ اے تیرگواری ءَ مجید ءَ ماں سر ءُ سینگ ءَ تیر وارتگ ءُ جاہ ءَ ساہ داتگ، پرزاد ھم سکّ ءَ ٹپیگ ءُ نادراہجاہ ءَ سر کنگ بوتگ.
Be the first to comment