کرمان ءِ بندیگجاہ ءَ بلوچے بندیگے، دیمیں مردمے مات ءِ رزایت دیگ ءَ پد چہ پاھو ءَ رکّتگ

رَسانک نیوز/ 20 مہر ماہ 1404 ءَ، کرمان ءِ بندیگجاہ ءَ بلوچے بندیگے ھماں وھدا کہ پاھو ئے دار ءَ سر بوتگ دیمیں مردم ئے مات ءَ وتی چُکّ ءِ ھون بکشاتگ ءُ اے پیم ءَ اے بلوچے بندیگ چہ پاھو ءَ رکّتگ. اے بلوچے بندیگ کہ آئی نام «ابدلباست سنجرانی» اِنت دیمترا پہ کوش ءِ الزام ءَ پاھو ئے ھکم وارتگ۔ چار روچ پیسرا پہ پاھو ئے دیگ ءَ ایوکیں واڈ ءَ شور دیگ بوتگ.

ابدلباست سنجرانی، 28 سالگ، ابدلوھاب ءِ چُک، آروس کرتگ ءُ دو زھگے پت، بُندر ءَ دُزاپ ءُ انّیگیں وھدا ریگان ءِ جھمنند اِنت۔ ماں سال 1400 ءَ، آئی کوش ءِ پروندہ ئے دیم ءَ دزگیر کنگ بوتگ۔ آئی ءِ ھاندان ءِ نزّیکیں مردمان ءَ گوشتگ: چہ دزگیر کنگ ءَ بہ‌ گر داں انّیگیں وھدا باست ءَ اے گپّ ءَ زور داتگ کہ ھچ پیمیں کوشے نہ کرتگ۔ اے کوش ءَ دگہ مردمے ءَ کرتگ.

ابدلباست ءِ چہ پاھو ءَ رکّگ گوں شکایست کنوکے مات ءِ رزایت ءَ، ھماں وھدا پیش اَتکگ کہ بازیں بلوچے بندیگے، تنگ دستے، زانتکاریں وکیلے نہ بوھگ، اِنساپ ءَ ھمردیں پئیسلہ آنے نہ‌ بوھگ ءَ وتی پاھو ئے ودارا اَنت۔ اے ھماں جیڑہ اَنت کہ بازیں سالے دہ آں بلوچے ساہ گپتگ ءُ نابرابری ءُ نااِنساپے ءَ ماں ایران ءِ اِنساپ ءِ ادارہ‌آں درا کنت ءُ پیش دار اَنت.