رَسانک نیوز/ زی سئے شمبے 25 شہریور ماہ 1404 ءَ، دُزاپ ءُ واش ءِ راہ ءَ کلچات دمگ ءِ نزّیک ءَ پژو پارس گاڑی ءَ نندوکیں سئے نزامی کارمندے سرا اُرش ءِ زمہ واری جیش الادل ءَ منّتگ۔ اے اُرش ءَ دو نزامی کارمند کُشگ ءُ یکے ٹپیگ بوتگ.
ایرانے رژیم ءِ ھلاپیں گل ءَ وتی جارتاک ءَ گوشتگ: پکّائیں ھالانے کارمرز کنگ ءَ، یکّ ءُ ٹکّیں کاروایی ءَ دُزاپ ءُ واش ءِ راہ ءَ سب ءُ سورانے انتزامی کمانڈر ءَ آئی ءِ گاڈ ءُ ڈریور ئے ھوری ءَ کُشتگ.
اے جارتاک ءَ گوشگ بوتگ: سرہنگ ابراھیم پزیلتی یکی چہ سرکارے ڈلگیں مُھرہ آں زانگ بوتگ ءُ آئی ءَ پہ بلوچانے پادلپاش کنگ ءُ ترس ءُ بیم ئے دیگ ءَ بازیں کاروائیان ءَ بہر زورتگ. جیش الادل ءَ گوشتگ: ھر وھد رژیم ءِ سلاہ بندیں ٹولی آنے کارمند مئے پدائیانے گون ءَ دوچار بہ کپ اَنت، بہتر اِنت وتی سلاہ آں ڈگار ءَ ایئر بہ کن اَنت ءُ تسلیم بہ بنت، اے پیم آیان ءَ کمتر نُکساں سر بیت.
اے اُرش ءَ «یونس سیّاد اربابی» ءُ «اِبراھیم پیری» کُشگ بوتگ اَنت ءُ «اِبراھیم پزیلتی»، سب ءُ سورانے انتزامی کمانڈر ٹپیگ بوھگ ءَ رند، پہ درمان ءَ دُزاپ ءِ نادراہجاہے ءَ سرکنگ بوتگ.
ھماں کہ چمّ وت اے ویل دیستگ، گوشتگش: سلاہ بندیں مردمان ءَ چُنت تیر ئے ھشاپ اے نزامے کارمندانے سرا چَنڈ اِتگ۔ اے اُرش ءَ ٹپیگ بوتگیں نزامی کارمندے کہ آئی ءِ ھالت بے گیگ بوتگ واش ءِ نادراہجاہ ءَ سر کنگ ءَ پد، دُزاپ ءِ نادراہجاہے ءَ دیم دیگ بوتگ. ھال سرکنوکان ءَ گوشتگ: نزامی ٹولی ءِ کارمند پہ وتی ادارے کارانے ٹاھینگ ءُ درمان ءَ دُزاپ ءَ شُتگ اَنت ءُ آیانی گاڑی ءَ بازیں درمانے رِھتگ ءُ تالاں بوتگ.
سرکاری میڈیا ءَ اے ھال منّتگ ءُ گوشتگ: سورانے نزامی دستئے سئے کارمند ھماں وھدا کہ چہ دُزاپ ءَ پہ سوران ءَ واتر کنگ بوتگ اَنت سلاہ بندیں مردمان ءَ آیانی سرا اُرش کرتگ.
گوشگ لوٹیت: اے اُرش ءَ پد، نزامے ءُ چیریں ادارے مزنیں پلٹنی گوں سرکاری ءُ زاتی گاڑیاں جاہ ءَ دیم دیگ بوتگ، سرکار ءَ دمگے ایمنی ئے ھالات تُرند کرتگ. نزامی ٹولی آن ءَ دُزاپ، میرجاوہ ءُ واش ءِ شہر آں زمینی ءُ ھوایی گشت بُنگیج کرتگ.
Be the first to comment