پہرہ ئے ڈمّن پاسگاہ ئے سرا اُرش ءَ کُشگ بوتگیں پنچ کارندگ ئے پجّار زانگ بوتگ، اے اُرش ءِ زمہ واری جیش الادل ءَ منّتگ

رَسانک نیوز/ زی جمے 31 مرداد ماہ 1404 ءَ، پہرہ ئے ڈمّن دمگ ءِ یک پاسگاہ ئے گاڑیانی کاروان ءِ سرا سلاہ بندین ءُ بے پجّاریں مردمانے اُرش ءُ تیرگواری ءَ کُشگ بوتگیں نزامی ٹولی ئے کارمندانے پجّار زانگ بوتگ. جیش الادل ئے گل ءَ وتی جارتاک ءَ اے اُرش ءِ زمہ واری منّتگ.

ڈمّن ئے شیبان پاسگاہ ئے کُشگ بوتگیں پنچ کارمند ے پجّار ءَ ایرانے سرکاری میڈیا ءَ اے وڑا گوشتگ:
1۔ سروان «گلامرزا وھدتی نیا»، زابل ئے نندوک (پاسگاہ ءِ مستر ءُ سروک)
2۔ ستوان دو «ھادی رویایی»، کرمان ئے مردم
3۔ گروھپان یک «مھمد نوروزی »، تربت ئے مردم
4۔ گروھپان یک «ھسن تولی»، گلستان ئے مردم
5۔ گروھپان «مھمدرزا رھیمی»، زابل ئے مردم

جیش الادل ءَ وتی جارتاک ءَ گوشتگ: آئی ءِ پدائیان ءَ پہرہ ئے ڈمّن دمگ ءِ پاسگاہ ءِ دو گاڑی ءَ اُرش ءَ گوں تباہ کرتگ ءُ کُشگ بوتگیں نزامی ٹولی ئے سلاہ ءُ سامان گوں وت ءَ پہ گنیمت ءَ برتگ اَنت. جیش الادل ءِ گل ءَ گوشتگ: نزامی ٹولی ئے سمند ءُ ھایلوکس گاڑیانے پہکیں نندوک کُشگ بوتگ اَنت.

جیش الادل ءَ ایرانے امنیتی ءُ نزامی ٹولی آنے سرا اُرش ءُ کُشگ ءَ، چہ شرئیت ءِ نیمگ ءَ وتی ھکّ زانتگ. ھمیں پیم ءَ جیش الادل ءَ بیہار داتگ اگاں امنیتی ٹولی ئے کارندگ آں وتی چِست ءُ ائیراں پہ امنیتی ادارہ آں یلا مہ کن اَنت، گڑا وتی جان ءُ ساہ ئے زمہ وار آیاں وت اَنت.