میرجاوہ ءِ لادیز دمگ ءَ، آروسی مھپلے ئے سرا تیرگواری ءَ دو بلوچے اِزمکار کُشگ ءُ ٹپیگ بوتگ

رَسانک نیوز/ 23 مرداد ماہ 1404 ءَ، میرجاوہ ءِ لادیز دمگ ءَ آروسی مھپلے ئے سرا چہ دیوان ءَ نندوکیں مردمے ئے تیرگواری ءَ دو بلوچے ساز ءُ زیمر ئے اِزمکار ءُ گُشندہ، کُشگ ءُ ٹپیگ بوتگ.

کُشگ بوتگیں بلوچے اِزمکار ئے پجّار «شمس الدین متربیان»، 52 سالگ، ھدابکش ءِ چُک، ٹپیگ بوتگیں بلوچے اِزمکار ئے پجّار «ھادی ریگی»، 22 سالگ، مھمد ءِ چُک، ھر دو میرجاوہ ئے نندوک زانگ بوتگ اَنت.

رَسانک ءِ ھال سرکنوکان ءَ گوشتگ: اے تیرگواری ھماں وھدا پیش اَتکگ کہ میرجاوہ ءَ آروسی مھپلے ئے سرا دیوانے نندوکیں مردمے ءَ تیرگواری کرتگ ءُ چہ اُداں در شُتگ۔ شمس الدین ءَ گردن ءَ، پاد، لاپ ءُ دل ءَ تیر وارتگ ءُ ساہ داتگ۔ ھادی اے مھپل ئے آں دگہ اِزمکار ءُ گُشندہ ءَ گُٹّ ءَ تیر وارتگ ءُ ٹپیگ بوتگ۔ ھادی پہ درمان ءَ دُزاپ ءِ نادراہجاہ ءَ سر کنگ بوتگ.

داں اے وھدا، اے ویل ءِ پُژدر زانگ نہ بوتگ، بلوچے دود ءُ رُبیدگ ئے دیوان آنے سرا اے پیمیں ویل ءُ واک آنے بوھگ ءُ زمہ وارانی بے تواری ءَ دمگ ءِ نندوکیں مردمانے دل پریشانے گیش کرتگ.