دُزاپ ءَ انتزامی ٹولی ئے زوریں تیرگواری، اے تیرگواری ءَ ٹپیگ بوتگیں جھمنندے دزگیر کنگ بوتگ

رَسانک نیوز/ 17 مرداد ماہ 1404 ءِ بانگواہ ءَ، دُزاپ ءِ سور ڈکّے دمگ ءَ، باکری روڈ ءَ شپ ساھت 1:30 ءَ نزامی ٹولی ئے سادہ پوشیں کارندگان ءَ زور ءَ تیرگواری ءَ پد، چہ تیرگواری ءَ ٹپیگ بوتگیں جھمنندے ءَ پہ زور ءُ ھژم ءَ دزگیر کرتگ. آیان ءَ کہ چمّ وت اے ویل دیستگ گوشتگ: امنیتی کارندگان ءَ بلوچے گُد پوشتگ ءُ گوں یکّ ءَ دگرا ماں زابلی گالوار ءَ پارسی ھبراِش کرتگ، آیاں چار پژو پارس گاڑی ئے نندوک بوتگ اَنت، دمگ ءَ سر بوھگ ءَ آیان ءَ زوریں تیرگواری کرتگ ءُ اے تیرگواری ءَ ٹپیگ بوتگیں جھمنندے ءَ دزگیر کرتگ ءُ پہ زور ءُ ھژم ءَ پژو پارس گاڑی ئے پدیں ڈبہ ءَ مان کرتگ ءُ گوں وت ءَ برتگ.

دزگیر بوتگیں مرد پاد ءَ تیر وارتگ ءُ آئی ءِ پجّار داں اے وھدا زانگ نہ بوتگ.

دمگے نندوکیں مردمان ءَ گوشتگ: دزگیر بوتگیں مرد ے آں دگہ سئے ھمراہ، در روگ ءَ سوبیں بوتگ اَنت۔ اے ٹکّر ءَ نزامی ٹولی ءَ پہ وتی کمک ءَ چہ شیرآباد ئے کلانتری ءَ گیشیں کارندگ لوٹتگ ءُ اے پیم ءَ سرجم دہ گاڑی بوتگ اَنت ءُ آیان ءَ دمگ ءِ تہا بوھگ ءُ درا بوھگ ءِ راہ بستگ اَنت ءُ اُداں گشت کرتگ، ھمیں وھدا نزامی ٹولی ءَ لوگے ئے سرا اُرش کرتگ ءُ دمانے اے لوگے بان ءِ سرا داشتگ۔ اے ٹکّر ءَ باز زوریں تیرگواری بوتگ ءُ تیرانے توار ءَ بازیں جھمنندے چہ وتی لوگاں در آتکگ آں.

ھال سرکنوکے ءَ گوشتگ: انتزامی ٹولی ءَ اے ٹکّر ءُ تیرگواری ئے پُژدر «دزّی» زانتگ، بلے پہ یک دزّی ئے مزنیں کاروائی ئے کنگ چہ اکل ءَ ڈنّ اِنت.

اے ویل ءَ پہ نازانتی ءَ یک زاتی گاڑی ئے تیرانے دپ ءَ کپتگ ءُ ڈریور ءَ گوشتگ کہ من بے گناہوں ءُ آئی ءِ گاڑی ءَ چُنت تیر لگتگ.