چہ نکهچ، کسرکند ءُ گہ ئے سئے راھی ءَ، پنچ روچ دیمترا آوار جنگ بوتگیں دو بلوچ داں انگت ءَ بیگواہ اَنت

رَسانک نیوز/ جمے روچ ءَ 10 مرداد ماہ 1404 ءَ، چہ نکهچ، کسرکند ءُ گہ ئے سئے راھی ءَ پنچ روچ دیمترا دو بلوچ کہ ایرانے امنیتی ٹولی ءَ آوار جتگ داں انگت ءَ بیگواہ اَنت ءُ آیانی ھالے سرپدئے دست نہ کپتگ ءُ نہ آیانی دارگ ءِ جاگہ زانگ بوتگ.

اے دوئیں بلوچے پجّار «ابدل‌اللہ اربابی»، 23 سالگ، میرو ئے چُک، نکوچ ءَ نوکائیکل دمگے نندوک ءُ «مھمد اربابی»، 30 سالگ، نواب ئے چُک، گہ ءِ مھبان دمگے نندوک گوشگ بوتگ.

رَسانک ءِ ھال سرکنوکان ءَ گوشتگ: اے دوئیں تروزھت، ھمان وھدا چہ نکوچ، کسرکند ءُ گہ ئے سئے راھی ءَ دزگیر کنگ بوتگ اَنت کہ آیان ءَ لوٹتگ پہ وتی زاتی کارانے ءَ ھینگ ءَ گہ ءَ برو اَنت. داں اے وھدا، امنیتی ادارہ آن ءُ زمہ واران ءَ آیانی دزگیر کنگ ءِ سوب نہ گوشتگ، نہ کہ آیانی دارگ ءِ جاگہ درا کرتگ۔ سرکارے اے درگت ءَ ھچ نہ گوشگ ءَ آیانی لوگے مردمانے دل پریشانے گیش کرتگ.

جھمنندانے وت سر ءُ در کانون ءَ دزگیر کنگ، دزگیر بوتگیں مردمان ءَ وکیلے دارگ ءِ ھکّ نہ دیگ ءُ آیان ءَ گوں لوگے مردمان ءَ ھبر کنگ ءَ نہ ھلّگ، جھمنندے ءُ انسانی ھکّانی پادلپاش کنگ زانگ بیت کہ ماں بلوچستان ءَ ھر روچ بوھگ اَنت ءُ کسی ایشی ءِ پسّو ءَ نہ دنت.