رَسانک نیوز/ پنچشمبے 9 مرداد ماہ 1404 ءِ سُہب ءَ، دُزاپ ءِ چیریں ادارے ٹولی ءَ میرجاوہ ءِ دمگ ءَ منباآپ ءَ لوگے ئے سرا اُرش ءَ گوں بلوچے آوار جتگ. اے کاروایی ءَ یک گونڈیں بے نندوکیں بال گرابے کارمرز کنگ بوتگ.
اے بلوچے پجّار «ابدلگپّار آزرنوش (گنگوزھی)»، 20 سالگ، مرادبکش ئے چُک گوشگ بوتگ. اے اُرش سہب ءِ ساھت 5 ءَ گوں یک گونڈین ءُ بے نندوکیں بال گرابے بال کنگ ءَ بنگیج بوتگ کہ امنیتی ٹولی ھژم ءُ تُرندی ءَ گوں لوگ ءِ سرا رھتگ اَنت.
چیریں ادارے ٹولی ءَ گوں ابدلگپّارئے پت ءُ لوگے مردماں کہ واب بوتگ اَنت پہ بے اھترامی ءُ سکّ سلّیں وڑیا پیش اَتکگ آں. آیان ءَ بے سرکارے آڈر ءَ، وت سر ابدلگپّار آوار جتگ ءُ بیگواہ کرتگ.
ابدلگپّار آزرنوش ئے ھال سرپدئے نہ بوھگ ءَ آئی ءِ لوگے مردم سکّ ءَ دل پریشاں کرتگ. ابدلگپّارئے لوگے مردمان ءَ چہ کارمستران ءُ زمہ واران ءَ لوٹتگ کہ آیانی چُک ءِ گناہ ءُ کُسور ءَ بہ گوش اَنت ءُ آئی ءِ دارگ ءِ جاہ ءَ ھم درا بہ کن اَنت.
Be the first to comment