گہ ءُ کنرک ئے دوراھی ءَ ٹیلے پمپ ءِ سرا اُرش ءَ پد، چہ دو نیمگیں سلاہ بندیں ٹکّر ءَ بلوچے کُشگ ءُ چار دگہ ٹپیگ بوتگ

رَسانک نیوز/ جمے روچ 3 مرداد ماہ 1404 ءَ، سلاہ بندیں ٹولی ئے گہ ءُ کنرک ءِ دو راھی ءَ ٹیلے پمپ ءِ سرا اُرش کرتگ۔ اے اُرش ءُ تیرگواری ءَ بلوچے کُشگ بوتگ۔ اِیشی ءَ پد دیمیں مردمان ءَ ھم تیرگواری کرتگ ءُ آیانی میان ءَ ٹکّر ءَ زور گپتگ ءُ چہ دوئیں نیمگ ءَ چار مردم دگہ ٹپیگ بوتگ.

رَسانک ءَ کُشگ بوتگیں بلوچے پجّار «ارسلان بادپا» امام بکش ئے چُک، دشتیاری ئے نندوکیں مردم ءُ یکے چہ ٹپیگ بوتگیں بلوچاں «اُمیر بادپا » ٹیلے پمپ ئے واھُند زانتگ، داں اے وھدا آدگہ سئے ٹپیگ بوتگیں بلوچانے پجّار زانگ نہ بوتگ.

اے اُرش ءُ ٹکّر ئے پُژدر کُہنین ءُ زاتی اَڑ ءُ جیڑے زانگ بوتگ۔ اے ٹکّر ءَ پہ دوئیں نیمگے مردمان ءَ نپ ءُ سیتی نہ بوتگ، بلکے دیمترا اگاں کماش ءُ اسپیت ریشانے جُھد ءُ میانجی گری مہ بیت، گوں امنیتی ادارہ آنے دپ کپگ ءَ دوئیں نیمگے مردمانے دردسر ءُ جنجال گیش بنت.