رَسانک نیوز/ 8 تیر ماہ 1404 ئے بیگاہ ءَ، پہرہ ءَ رازی نامے ءُ سلاہ کارئے دیوانے برجم دارگ بوتگ. اے دیوان ءِ سروک ءُ کماش مولوی پزل الرھمن کوھی بوتگ، دیوان ءِ برجم دارگ ءِ سوب شکری ءُ دھگانی کٹھمدانانے میان ءَ پد چہ شانزدہ سال جنگ ءُ ھون ریچی ءَ رازی نامے ءُ سلاہ کاری بوتگ.
اے رازی نامے دیوان ءَ پہرئے کماش ءُ اسپیت ریشیں مردمان ءَ بید، وانندگ ءُ زانتکاریں مردمان ءَ بہر زورتگ، دیوان پہرئے مھمدان دمگ ءِ مسباھ الاُلوم دینی وانگجاہ ءَ برجم دارگ بوتگ.
مولوی پزل الرھمن کوھی، اے سلاہ کاری دیوانے برجم داروک زانگ بیت وتی ھبرانی تہا چہ دیوان ءَ نندوکیں مردمان ءَ، بَکشگ، تُپاکی ءُ پہ اَڑ ءُ جیڑانے سندگ ءَ، بلوچے دود ءُ رُبیدگ ءِ کارمرز کنگ ئے لوٹ کرتگ. مولوی پزل الرھمن ءَ چہ دوئیں کٹھمدانے سروک ءُ کماشان ءَ لوٹتگ کہ گوستگیں دژمنی ئاں بے ھال بہ کن اَنت ءُ پہ سلاہ ءُ دوستی ءَ گوں یکّ ءَ دگرا زندگی بہ کن اَنت.
Be the first to comment