رَسانک نیوز/ پنچشمبے 5 تیر ماہ 1404 ءِ سُہب ءَ، شستون ءِ آسپیچ دمگ ءَ سلاہ بندین ءُ بے پجّاریں مردمان ءَ ھماں وھد ءَ بلوچے آوار جتگ کہ آئی سوالہ ءِ پمپ ءَ وتی گاڑی ءَ ڈیزل جنگ ءَ بوتگ. سُہب ءِ ساھت 11:15 ءَ، چار سلاہ بندین ءُ بے پجّاریں مردمان ءَ اے بلوچ ءَ لٹ ءُ شاپ ءَ پد، وتی گاڑی ءَ سوار کرتگ ءُ برتگ. آوار جنوکان ءَ اُداں اُشتوکیں مردم ءِ تُرسینتگ ءُ در شُتگ اَنت۔ اے وھد ءَ امنیتی باسک ءُ پلیس ءِ یک کارمندے ھم اُداں نہ بوتگ.
آوار جتگیں بلوچے پجّار «جواد دھواری»، مھمدشریپ ءِ چُک، شستون ءَ، آسپیچ دمگ ءِ جھمنند زانگ بوتگ.
ھماں کہ چمّاں وت اے ویل دیستگ، گوشتگ: سلاہ بندیں مردمان ءَ گوں سی تیری ءَ اول سر ھوایی تیرگواری کرتگ ءُ پلپلے اسپرے شنزتگ ءُ جواد ءَ لٹ ءُ شاپ ءَ گوں زمین ءِ سرا واپینتگ ءُ بے وسی ءَ پد، زورے سرا وتی گاڑی ءَ سوار کرتگ ءُ چیریں جاگہے برتگ. جواد ءِ لوگ ءِ مردمان ءَ گوشتگ: آئی ءَ گوں کسی ءَ دُژمنی ءُ اَڑ ءُ جیڑے نہ بوتگ۔ جواد ءِ بیگواہ بوھگ ءَ آیاں سکّ ءَ دل پریشان ءُ گمیگ کرتگ.
ایران ءُ اسرائیل ءِ جنگ بندئے پد، بلوچستان ءِ ایمنی ءِ ھالات ھراب بوھگ اَنت. چہ پیسرا ٹاھینتگیں ویل ءُ واکاں روچ پہ روچ گیشتر بوھگ اَنت۔ روچے روژن ءَ جھمنندانے آوار جنگ، اے گپّ ءَ درا کنت کہ جھمنندانے ساہ ءُ مال ءَ پہ زمہ وارانے دل ءَ اردشتے نیست اِنت.
Be the first to comment