رَسانک نیوز، زی یکشمبے روچ 21 اردیبھشت ماہ 1404 ءِ بانگواہ ءَ، دُزاپ ءِ بندیگجاہ ءَ دو بلوچ بندیگ کہ دیمترا پہ ھون ءُ کوش ءِ الزام ءَ دستگر اِش کرتگ اَنت، پاھو دیئگ بوتگ اَنت.
اے دوئیں بلوچ بندیگانی پجّار «پریدون مھمدی» 36 سالگ، مھمد یوسپ ءِ چُک، پنّوچ ءِ ملک باگ دمگ ءِ نندوک، «مھمد الی میری (میر بلوچزھی)» 48 سالگ، ھُسین ءِ چُک، بُندر ءَ زابل ءِ مردم ءُ ھمیں شہر ءِ نندوک بوتگ.
ھال وش ءِ ھالانی رِد ءَ، پریدون ھپت سال دیمترا پہ کتل ءُ کوش ءِ الزام ءَ دستگر بوتگ ءُ آئی ءَ چہ چھبار ءِ بندیگجاہ ءَ پہ سزائے کشّ اَگ ءَ دُزاپ ءِ بندیگجاہ ءَ دیم اِش داتگ. مھمد الی ھم ماں سال 1398 ءَ ھوریں اَڑ ءُ جیڑی ءٗ ھشر ءَ پد، پہ ھون ءِ الزام ءَ دستگر ءُ پاھو ءِ سزا دیئگ بوتگ.
گوشگ بیت: مھمد الی ءِ کیس ءَ، کوشگ بوتگیں مردم، زابل ءِ نمایندگ ءُ لیڈر «پرھاد شھرکی» ءِ سیاد بوتگ ءُ آیان ءَ گوں ھمیں پاٹ بازی ءُ سپارش ءَ اے کیس مھمد الی ءِ سرا جتگ. میر بلوچزھی کٹھمدان ءِ سروک ءُ کماشیں مرد «ولی مھمد» ءَ پہ مرتگیں مردم ءِ پشت ءُ پد ءِ رازیگ نامہ ءُ سلاہ کنگ ءَ وتی وس ھلّینتگ بلے سوبین نہ بوتگ.
Be the first to comment