رَسانک نیوز، سہشمبے روچ 16 اردیبھشت 1404 ءَ، دُزاپ ءُ نسرتآباد ءِ میان راہ ءَ بے پجّارین ءُ سلاہ بندیں مردمان ءَ، یک سواری گاڑئے نندوکان ءِ سرا تیرگواری کرتگ۔ اے تیرگواری ءِ سوب ءَ گاڑی ءَ نندوکیں 15 سالگیں زھگ ءُ آئی ءِ مات ءُ گوھار ٹپیگ بنت۔ اے 15 سالگیں زھگ 17 اردیبھشت ءَ ماں دُزاپ ءِ ھاتم الانبیاءِ نادراهجاہ ءَ ساہ دنت.
اے زھگ ءِ پجّار، «اویس بلوچی (نارویی)» 15 سالگ، جاں مھمد ءِ چک ءُ دُزاپ ءِ جھمنند زانگ بوتگ۔ اے ویل ءَ آئی ءِ 17 سالگیں گوھار ءُ مات ھم تیر ور اَنت ءُ ٹپیگ بہ اَنت.
رَسانک ءِ ھال سرکنوکان ءِ رِد ءَ: شپ ءِ ساھت 22:30 ءَ تا سیاہ ءِ چیک پوسٹ ءَ پیسر، دو پژو گاڑئے سلاہ بندیں نندوکاں آیانی گاڑی ءِ سرا تیرگواری کن اَنت۔ اویس ءِ پت وتی جند ءُ چکّانی ساہ ءِ رکّھینگ ءَ گاڑی ءَ ماں ھاکاں دَور دنت۔ بلے سلاہ بندیں مردماں چہ تیرگواری ءَ دست ءَ نہ دار اَنت.
ھال سرکنوکان ءَ گوشتگ: کہ اویس ءِ پت ءَ گوں ھچ کس ءَ اَڑ ءُ جیڑی نہ بوتگ۔ اے تیرگواری ءَ اویس ءِ گُھٹگ ءُ پُپ تیر ور اَنت ءُ ھون شھار اَنت، بازیں ھون ءِ ریچگ ءَ اویس ساہ دنت ءُ بیران بیت۔ اویس ءِ مات ءُ گوھار ءِ ھم آپریشن بوتگ ءُ ھال اِش وشتر بوھگ اِنت.
بلوچستان ءِ راھان ءَ اے وڑیں ویل ءُ واک گیش بوھان اَنت ءُ سرکار ھم اے گپّ ءَ دل گوش نہ دنت.
Be the first to comment