رَسانک نیوز، زی دوشمبے روچ 8 اردیبھشت ماہ 1404 ءِ بانگواہ ءَ اسپھان ءِ دستگرد بندیگجاہ ءَ چار بندیگ لوپ دیئگ بوتگ اَنت، آیانی میان ءَ سہ بندیگ بلوچ ءُ یکی دگہ جنین آدمی بوتگ.
سہ ایں بلوچ بندیگانی پجّار، «روح اللہ پلنگی» 26 سالگ، گل مھمد ءِ چُک، دو زھگ ءِ پت ءُ ریگان ءِ نندوک، «مھمد توتازھی» 26 سالگ، رئوپ ءِ چُک، دُزاپ ءِ مینویی دمگ ءِ جھمنند، «عبدالرشید براھویی» 41 سالگ، انوشیروان ءِ چُک، یک زھگ ءِ پت ءُ دُزاپ ءِ کریم آباد دمگ ءِ جھمنند زانگ بوتگ، لوپ دیئگ بوتگیں جنین آدم ءِ پجّار «مرجان سبزی» لرستان ءِ نندوک زانگ بوتگ.
سربوتگیں ھالانی رِد ءَ روح اللہ پنچ سال پیسرا اسپھان ءَ دستگر بوتگ. مھمد ءُ عبدالرشید ءُ آں یکیں جنین آدم مھر ماہ 1398 ءَ ماں اسپھان صوبے اردستان ءِ شھر ءَ پہ منشیات ءِ الزام ءَ دستگر بوتگ اَنت.
گوشگ لوٹیت سہ ایں بلوچ بندیگان ءَ گوستگیں روچ ءَ یک روچی چہ لوپ دیئگ ءَ پیسر دہ دکیکت گوں وتی لوگ ءُ کھول مردماں آھریں گِندوک اِیش کرتگ.
Be the first to comment