نێکشهرا یکّے چه وانگجاهانی و دینی وانگجاهئے اُستادان گۆن کپسولئے ترکّگا بێران بوتگ

رَسانک نیوز

دوشمبهئے رۆچا ۳ دئے ۱۴۰۳، نێکشهرئے یکّے چه وانگجاهانی و دینی وانگجاهئے اُستادان، بازێن ٹپّانی سئوبا گۆن کپسولئے گُمبارگا وتی ساهی چه دستا داتگ.

اے بلۆچ جهمنندئے پجّار مئولوی (جان مهمد رئیسی)، کساس ۵۰ سالگ، آهردادئے چُکّ و کوشکئے هلکئے مردم چه نێکشهرئے دمگان گوشگ بوتگ.

گێشێن هالانی رِدا، کپسولئے گمبارگئے سئوبا مئولوی مهمد سُتکگ و پد چه اِشیا که سۆتکگێن مردمانی نادراهجاها برگ بوتگ پد چه چُنت وهدا بازێن ٹپّانی سئوبا وتی ساهی چه دستا داتگ.

گوشگی اِنت که سئےشمبه اَسُرا، ۴‏ دئے ماه، اے نامدارێن مئولویئے لاش، گۆن مئولوی و واننده و مردمانی گۆما آییئے زادگاها هاکا کنگ بوتگ.