جُمَهئے رۆچا ۶ مهر ۱۴۰۳، یک بلۆچ جهمنندے گۆن سلاهبندێن مردمانی تیرگواریان که آیی و آییئے ماشینئے نێمگا کئوسرئے هئیابانا، ۲۷می دمگا بوتگ، گۆن پنچ تیرئے لگّگا وتی ساهی چه دستا داتگ.

اے جهمنندێن بلۆچئے پجّار (مهمد شیرزاهی)، کساس ۲۳ سالگ و دُزآپئے نندۆک گوَشگ بوتگ.

همے هالانی رِدا، اے جهمنند گۆن وتی پژوێن ماشینئے گۆما گوزگا بوتگ که سلاهبندێن مردمان آییئے نێمگا تیرگواری کُرتگ اشیئے سئوبا پنچ تیر آییئے گردن و سر و جانا لگّتگ و گۆن اورژانس دێر آیگ و نادراهجاهئے برگئے گۆما وتی ساهی چه دستا داتگ.

چه جنۆکانی پَجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.