رَسانک نیوز

دوشمبهئے رۆچا ۵ شهریور ۱۴۰۳، یک تویوتا وانتێن ٹێلکشّے انتزامی نیروانی دستا چهبارئے ورودی جادّها ابێد چه اۆشتارێنگ و هُشدار دئیگا دُمبال کنگ بوتگ.

انتزامی نیروان سُهبئے ساهت نُها چهبارئے ورودی جادها ترمینالئے دێم په دێما یک تویوتا وانتێن ٹێلکشّے ابێد چه پێسری اۆشتارێنگ و هُشدار دئیگا شُلُکێن جادها دُمبال داتگ که ماشین والا چه اۆدا تتکگ.

ٹێلکشی چه هما کاران هساب بیت که بازێنے چه بلۆچێن جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیلان چۆ گاڑیئے چپّ کنگ و امنیتی و نزامی نیروانی تیرشانیا دێم په دێم بنت و آیانی جانا تهدید کنت.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.