رَسانک نیوز

سئے شمبهئے سُهبا ۱۶ مرداد ۱۴۰۳، یک سراوانی تاجرے که جهبارئے نندۆک‌اِنت مُدرسئے هئیابانا چهبارئے شهرا رَند چه اِشیا که چه وتی لۆگا دراتکگ نامالومێن سلاهبندێن مردمانی تیرانی آماچ بوتگ و وتی ساهی چه دستا داتگ.

اے جهمنندێن بلۆچئے پجّار (گل مهمد نسرت زهی)، کساس ۶۳ سالگ، سور کُرتگێن، ۱۲ چُکّئے پت و ناهۆکئے نندۆک چه سراوانئے دمگان و چهبارئے جهمنند گوَشگ بوتگ.

همے هالانی رِدا، هاج گل مهمد گۆن وتی زاتی ماشینا مدرسئے هئیابانا چه وتی لۆگا مسیتا رئوگا بوتگ آیی و آییئے ماشین نامالومێن سلاهبندێن مردمانی تیرانی آماچ بوتگ که گۆن چُنت تیرئے ورگا وتی ساهی چه دستا داتگ.

چه جنۆکانی جنَگئے سئوب و آیانی پَجّارا هچ هالے نێست

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.