واش ئے ایرندگان ءَ نزامی ٹولییے کمین ءُ تیرگواری ءَ دو بلوچ کُشگ بوتگ

رَسانک نیوز/ مروچی یکشمبے 24 آبان ماہ 1405 ءِ سباھا، واش ئے ایرندگان زِلّهئے مرنتاک دمگ ءَ چه نزامی ٹولییے کمین ءُ سلاہ‌بندیں ٹکّر ءُ تیرگواری ءَ دو بلوچ کُشگ بوتگ. ھماں وھدا که اے دوئیں بلوچ چه واش ءَ دیم په ایرندگان ءَ روگ ءَ بوتگ اَنت، نزامیانی تیرگواری ئے دپ ءَ کپتگ ءُ کُشگ بوتگ اَنت. ٹکّر ئے آسر بوھگ ءَ رَند آیانی بے ساھیں جون واش ئے نادراہجاہ ءِ برپهانگ ءَ سرکنگ بوتگ اَنت.

رَسانک ءَ کُشگ بوتگیں بلوچانی پجّار «میاالدین (مهی‌الدین)المی ‌مارندگان»، کِساس 35 سالگ، رھمت ئے چُک ءُ آ دگه بلوچ گوں ھاندانئے نام «جمالزھی» ءَ ھر دو ایرندگان ئے نندوکیں مردم ءُ واش ئے جهمنند زانتگ.

رَسانک ءِ ھال سرکنوکانی رِد ءَ، اے ویل سباھئے ساھت 4 ئے وھدا گوں نزامی ٹولییے راھئے سرا کمین کنگ ءُ تیرگواری ءَ ماں مرنتاک دمگ ءَ پیش آتکگ. رَند چه اشیا که اے بلوچانی گاڑی نزامیانی نزّیکا سر بوتگ نزامیان ءَ بید چه جار ءُ دلگوش دیئگ ءَ آیانی سرا تیرگواری کرتگ، رَند چه ھُردیں ٹکّریا گاڑی ئے ھر دوئیں نندوکان ءَ تیر وارتگ ءُ ساہ داتگ.

ھمے تَچکیا، سیستان بلوچستان سوبهئے انتزامی کمانڈر ئے جهنشین ءَ وتی درشانی ءَ گوشتگ: اے دوئیں بلوچان ءَ گاڑی دُزّیں ٹولییے مردم زانتگ ءُ داواھی کرتگ اے ٹکّر ءَ ھمیں ٹولییے دو مردم کُشگ بوتگ. آییا گوشتگ: دو سی تیری، پنچ ھِشاپ، 600 دانگ تیر، یک دزّتگیں نمبر پلیٹے ءُ یک دزّتگیں تویوتا گاڑی یے دست ءَ کپتگ ءُ زپت بوتگ. ھمے وڑا دو تویوتا ءُ پژو گاڑییے دیم دارگ بوتگ.

گوں اے جاور ءَ، رَسانک ءِ ھال سرکنوکانی رِد ءَ، اے دوئیں بلوچ چه نزامیانی کمین ءُ تیرگواری ءَ کُشگ بوتگ اَنت. داں انگت ءَ انتزامی سروک ئے اے ویل ئے بارئوا داواہ اَلّم نه اِنت.

Be the first to comment

Leave a Reply

Your email address will not be published.


*