میرجاوہ ءُ دزاپ ءِ راه ءَ سپاہ ءِ ٹولییے تیرگواری ءَ ٹیلکشّیں بلوچے ٹپّیگ بوتگ

رَسانک نیوز/ جمے روچ 15 آبان ماہ 1405، میرجاوه ءُ دزاپ ءِ راه ءَ ٹیلکشّیں ورنائیں بلوچے چه سپاہ ءِ سادہ پوشیں ٹولییے وت سر ءُ تَچکیں تیرگواری ءَ سکّ ٹپّیگ ءُ نادراہجاہ ءَ سرکنگ بوتگ.

اے بلوچئے پجّار «یونس برھانزھی»، 21 سالگ، اُمر ئے چُک، دزاپ ءِ نندوک زانگ بوتگ.

اے ھالئے رِد ءَ، اے ٹیلکشّ چه میرجاوه ءَ دزاپ ئے تها بوھگئے راہ ءَ بوتگ که سپاه ءِ سادہ پوشیں ٹولی ءَ آییئے سرا تچکیں تیرگواری کرتگ که اے ٹیلکشّ ءَ ماں دست ءَ تیر وارتگ ءُ سکّ ٹپّیگ بوتگ. ویل ءَ رَند دزاپ ءِ نادراہجاھیا سرکنگ بوتگ ءُ بستری اِنت.

گوشنت: اے بلوچئے دست ءِ نُکس ھمینچک باز اِنت که ڈاکٹران ءَ آییئے دست ئے رکّگ یانکه کَشّگ ءَ پنجاہ، پنجاہ گوشتگ ءُ دست ئے جاور انگت ءَ اَلّم نه اِنت.

ھال زانتیں ھال سرکنوکییا اے بارئوا گوشتگ: سپاہ ءِ ساده پوشیں ٹولییا بید چه جار ءُ دلگوش دیئگ ءَ اے بلوچئے گاڑییے سرا تیرگواری کرتگ، اے ھال سرکنوک ءَ گوشتگ: آیی په وتی ھاندانئے مالی جنجالانی ٹاھینگ ءَ ٹیلئے کَشّگ ءَ دلگوش بوتگ ءُ بلکیں چه بازیں ٹپّاں آییئے دست کَشّگ ببیت.