رَسانک نیوز/ پنچشمبے 16 مهر ماہ 1405، راجی پدائیانی سنگر ءَ گوں جارتاک ءِ شِنگ کنگ ءَ دزاپ ءِ نسرتآباد ءُ گِه ءُ چهبار ئے راہ ءَ نزامی گاڑیانی سرا بوتگیں اُرش ئے زمّهواری ءَ منّتگ.
اے گل ءَ وتی جارتاک ءَ گوشتگ: ائولی اُرش ءَ نسرتآباد ءَ رینجرز ٹولییے گاڑییے سرا تیرگواری بوتگ، که اے تیرگواری ءَ گاڑی ءَ نندوکیں سجّهیں نزامیان ءَ تیر وارتگ. پیش چه اشیا سرکاری میڈیا ءَ گوشتگ: اے اُرش ءَ ستوان سئے «وھید اِنایت»، یکے چه نزامی کارمنداں کُشگ بوتگ.
ھمے وڑا راجی پدائیانی سنگر ءَ گوشتگ: ماں دگه اُرشی ءَ گِه ءُ چهبار ئے راہ ءَ «کرین دوک»، دمگئے نزّیکا نزامی بُنجاھئے تها بوھگئے جاھا دو نزامی گاڑی یک ون ءُ یک تویوتا ھایلوکس گاڑییے سرا تیرگواری کرتگ که گاڑیانی سجّهیں نندوکاں کُشگ یانکه ٹپّیگ بوتگ اَنت. رَسانک ءَ سربوتگیں پیشیں ھالانی رِد ءَ، اے راہ ءَ نزامی ھایلوکس ءُ ھُردیں بسی اُرش ئے دپ ءَ کپتگ اَنت ءُ آیانی تمامیں نندوکاں کُشگ یانکه ٹپّیگ بوتگ اَنت.
سرکاری میڈیا ءَ «مهمد رزا اوکاتی»، زمینی پئوج ئے سلاہبندیں 88 اُمیں لشکر ئے کارمند ئے کُشگ بوھگ ءُ سئے دگه نزامی کارمندے ٹپّیگ بوھگئے ھال تسدیک کرتگ ءُ منّتگ.
اے دوئیں اُرش کمے رَند چه جالک ئے انتزامی کمانڈر ئے بُنجاھئے سرا اُرش ءَ کنگ بوتگ اَنت. اے اُرش ئے زمّهواری ءَ پیشترا راجی پدائیانی گل ءَ منّتگ.
Be the first to comment