
رَسانک نیوز/ جمے 22 آبان ماہ 1405، کسرکند ئے ساربوگ شهر ءَ گوں مزنیں، بابهروسهین ءُ اسپیت ریشیں مردمانی ھور بوھگ ءَ «بلیدہ/رئیسی» ءُ «سلاھزھی»، کبیلهانی میان ءَ رازی نامه ءُ سلاھکاری ئے مراگشے برجم دارگ بوتگ ءُ آیانی میان ءَ جیڑہ ءُ جنجال گوں سلاھکاری ءَ آسر بوتگ اَنت. اے مراگش کرار بوتگ گوستگیں ھپتگ ءَ برجم دارگ ببیت، بله جهمنندییے اَچانکا بیران بوھگئے سئوب ءَ په پدییا ائیر کنگ بوتگ. دوئیں کبیلهانی میان ءَ چه جیڑہ ءُ جنجال ءَ بازیں مردمی کُشگ ءُ ٹپّیگ بوتگ ءُ بازینے بندیگ کنگ بوتگ.
مروچیگیں مراگش ءَ، دوئیں کبیلهانی مردماں وتی میان ءَ سلاھکاری ئے جار جتگ ءُ گوستگیں جیڑھاں شمشُتگ ُ په آؤکیں روچاں وتی میان ءَ جیڑہ ءُ جنجالانی دیما دار اَنت. گُڑسرا دوئیں نیمگئے مردمان ءَ یکادگرا بگل کرتگ ءُ وتی میان ءَ سلاھکاری ئے جار جتگ.
اے سلاھکاری یے مراگش رَند چه دمگ ئے کماش ءُ بابهروسهیں مردمانی جهد ءَ په آؤکیں روچاں دوئیں کبیلهانی میان ءَ ایمنی یے بوھگ ءَ برجم دارگ بوتگ. اے مراگش ئے برجم دارگ ئے سئوب دوئیں کبیلهانی میان ءَ رازی نامه ئے کنگ ءُ جیڑھانی دیمروییے دارگ بوتگ.
Be the first to comment