شستون ءَ بلوچے کُشگ بوتگ؛ کوش ءَ پد بے ساھیں جون دگه جاگهے برَگ بوتگ

رَسانک نیوز/ پنچشمبے 14 آبان ماہ 1405 ءِ شپ ءَ، شستون ءَ بلوچے ماں وتی لوگ ءَ سلاہ‌بندین ءُ پجّار نه بوتگیں مردمانی دست ءَ کُشگ بوتگ. کوش ءَ پد آییئے بے ساھیں جون چه «کهنوک ئے کور» ئے نزّیک ءَ شوهاز بوتگ. ھاندان ئے بنگیجی رندگیریان ءَ درا کرتگ که کوش دگه جاگهیا کنگ بوتگ.

اے بلوچئے پجّار «اسماییل منسوری»، کِساس 25 سالگ، ابراھیم ئے چُک، آروس کرتگ ءُ یک ھُردیں جنیں چُکّییے پت، شستون ءَ مهمدی دمگئے نندوک زانگ بوتگ.

اے ھالئے رِد ءَ، اسماییل ءَ شستونئے شهر ءَ بلوچزھی درمانجاھئے دیما پلاپل ءِ دکّهی بوتگ. ویل ئے وھدا آیی وتی لوگ ءَ ایوک ءَ بوتگ ءُ لوگ بانوکی په وتی ھاندان ئے چارگ ءُ دیدار ءَ اھواز ءَ شُتگ. آیی رَند چه اشیا که چه کار ءَ لوگ ءَ پدترّتگ، اُرش ئے دپ ءَ کپتگ ءُ چه تیرگواری ءَ ساھی داتگ. رَند چه اشیا آییئے بے ساھیں جون کهنوک ئے کور ئے نزّیکا برَگ بوتگ ءُ آییئے گاڑی ھم ھمے جاھا یله دیئگ بوتگ.

اے بلوچئے سیادان ءَ گوَشتگ: آییئے جون ءَ تیرانی نشان ائیر بوتگ اَنت ءُ دپی ھم ٹپّیگ بوتگ. آیانی رِد ءَ، آییئے گاڑی ءُ موبایل پئون دُزّی نه بوتگ اَنت، که چه اے گپّ ءَ کوش ئے پُژدر دُزّی کنگ بیت نه کنت.

اے بلوچئے ھاندان ءَ گوشتگ: نزامی ٹولییا ویل ئے ھال دیئگ بوتگ بله تاں ھم په لاش ئے برپ‌هانگ ئے سرکنگ ءَ نه شُتگ اَنت ءُ گُڑسرا لوگ ئے مردمان ءَ گوں باری گاڑی ءَ بے ساھیں جون برپ‌هانگ ءَ سر کرتگ. آیانی رِد ءَ، آمبولانس جاھا سربوتگ بله لاش ءَ برپ‌هانگ ءَ سری نه کرتگ.

منسور ئے ھاندان ءُ لوگ بانوک په لاش ئے دست گِرَگ ءَ کانونی رندگیریاں دلگوش اَنت. داں انگت ءَ جنوکانی پجّار ءُ آیانی سئوب چه اے کوش ءَ زانگ نه بوتگ ءُ اے بارئوا گیشتریں ھالے دست نه کپتگ.