پهرہ ءَ ابتر ئے میدان ءَ سلاہ‌بندیں مردمانی تیرگواری ءَ بلوچے کُشگ بوتگ؛ نزّیکیں مردمان ءَ امنیتی ادارھانی سرا شکّ اِنت

رَسانک نیوز/ سئے شمبے 12 آبان ماہ 1405 ءِ بانگواه ءَ، پهرہ ءَ ابتر ئے میدان ءَ بلوچے سلاہ‌بندین ءُ بے پجّاریں مردمانی تیرگواری ئے دپ ءَ کپتگ ءُ چُنت تیرے لگّگ ئے سئوب ءَ ساھی داتگ. اے بلوچئے نزّیکیں مردمان ءَ شکّ اِنت په اشیا که آیان ءَ گوں کُشگ بوتگیں راجی پدائیانی سنگر ئے پداییا ھاندانی جُڑشت بوتگ، امنیتی ادارھاں اے کوش ءَ ھور بوتگ اَنت.

رَسانک ءَ اے بلوچئے پجّار «ابدلرئوپ ھملی»، کِساس 38 سالگ، ابدلکریم ئے چُک، آروس کرتگ ءُ پنچ زھگئے پت، بُندر ءَ مگس ءِ مدھوک دمگئے نندوک ءُ پهرہ ئے اَلی‌آباد دمگئے جهمنند زانتگ.

رَسانک ءِ ھال سرکنوکانی رِد ءَ، بانگواه ءِ ساھت یک ءَ ھماں وھدا که ابدلرئوپ وتی زاتی گاڑی ءَ گوں ابتر ئے میدان ءَ روگ ءَ بوتگ سواری گاڑییے چار سلاہ‌بندیں مردمان ءَ آیی په رگبار بستگ. اے اُرش ءَ آییا چُنت تیر وارتگ ءُ ماں وتی گاڑییے تها ساھی داتگ، اُرش کنوکاں تیرگواری ءَ رَند چه جاھا دَر شُتگ اَنت.

ابدلرئوپ ئے سیاد گوشنت: که آییا گوں ھچ کس ءَ زاتی جیڑہ ءُ جنجالے نه بوتگ ءُ گُمان کننت په برات زھت (ابوزر ھملی) ئے سئوب ءُ سیادی ءَ اے اُرش ئے دپ ءَ کپتگ. ابوزر ھملی چه راجی پدائیانی سنگر ءَ ھوریں مردماں بوتگ که تاریک 10 مهر ماہ 1405 ءَ ماں راسک ءَ بیدلد ئے شوشگیم کوھستگ ءَ نزامی ٹولییا گوں ٹکّر ئے وھدا کُشگ بوتگ.

ھمے وڑا پیشترا «ابدلهلیم ھملی»، رئوپ ئے 50 سالگیں برات، تاریک 21 اردیبهشت ماه 1405 ءَ «ناسر جمالزھی»، «ابدلماجد جمالزھی» ءُ منسور جمالی ئے ھوری ءَ ماں پهرہ ئے سرکهوران دمگ ءَ چه چیریں ادارھئے تیرگواری ءَ کُشگ بوتگ. امنیتی ٹولی آیانی کُشگ ءَ رَند، بے ساھیں جون ءُ گاڑیانی سرا ٹیل ریهتگ ءُ مان داشتگ اَنت.