کنرک ءَ چئیریں ادارھئے سادہ پوشیں ٹولییا گوں بلوچییے لوگئے سرا اُرش ءَ آیی دزگیر کرتگ

رَسانک نیوز/ چارشمبے 6 آبان ماہ 1405، کنرک ءَ چئیریں ادارھئے سادہ پوشیں ٹولییا گوں بلوچییے لوگئے سرا اُرش ءَ آیی ءَ بید چه کئسور ءُ مئیار ئے گوشگ ءَ دزگیر کرتگ ءُ چئیریں جاگهی برتگ.

رَسانک ءَ اے بلوچئے پجّار «شبیر ریگی جریزھی»، 25 سالگ، شبیر ئے چُک، آروس کرتگ ءُ دو زھگئے پت ءُ کنرک ئے جهمنند زانتگ.

رَسانک ءِ ھال سرکنوکانی رِد ءَ، چئیریں ادارھئے سادہ پوشیں ٹولی که آیان ءَ په ٹِکّ ءُ پاس ءَ بے نندوکیں بالیگرابے کارمرز کرتگ، ائولسرا اے بلوچئے لوگ چاربند کرتگ ءُ رَند چه اشیا بید چه سرکار ئے ھُکم ءَ لوگ ءَ تها بوتگ اَنت. لوگا تها بوھگ ءَ رَند اے ٹولییا شبیر دزگیر کرتگ ءُ گوں وت برتگ.

ھال سرکنوکان ءَ گوَشتگ: چئیریں ادارھئے ٹولییا په اے بلوچئے دزگیر کنگ ءَ ھچ پئیمیں سرکاری ھُکمے پیش نه داشتگ ءُ ایوکا لوگئے مردمان ءَ دپی گوشتگِش که آییا یک زاتی داواہ دارے است.

کنرک ءَ شبیر وتی پت ئے ماھیگ گِرَگ ئے بوجیگ ءَ کارا بوتگ ءُ گوں اشیا که آییئے دزگیر بوھگ ءَ دو روچ گوَستگ بله داں انگت ءَ بے ھالے سرپد ئے اَنت ءُ نه که لوگئے مردمان ءَ پئونی کرتگ. شبیر جریزھی ئے بے ھالے سرپد ئے بوھگ ءَ لوگئے مردمانی دل پریشانی گیش کرتگ.