پاریاب ءَ امنیتی ٹولییے تیرگواری ءَ کُشگ بوتگیں بلوچئے پجّار زانگ بوتگ

رَسانک نیوز/ مروچی یکشمبے 19 مهر ماہ 1405، رَسانک ءَ بلوچییے پجّار که زی 18 مهر ماہ ءَ ماں پاریاب ءَ چه امنیتی ٹولییے تیرگواری ءَ کُشگ بوتگ، درا کرتگ. سرکاری ءُ کرمان سوبهئے امنیتی سروکان ءَ آییا یکے چه نزامی کارمند ئے سرا تیرگواری کنوکیں مردماں زانتگ. اے داواہ ءَ آییئے مردمان ءَ گوں زوریں لبزاں رَد کرتگ.

رَسانک ءَ اے بلوچئے پجّار «میسم بامری»، کِساس 29 سالگ، پشموکی دمگئے نندوک زانتگ، که ھمے دمگئے دھیار ھم بوتگ.

کرمان سوبهئے سرکاری ءُ امنیتی سروکان ءَ داواہ کرتگ که مئیسم بامری پاریاب ئے جُست پُرس کنوکیں ادارھئے کارمند «مهدی جمشیدی» ئے کُشگ ءَ ھور بوتگ، که پنچشمبے 16 مهر ماہ ءَ ماں شهر ئے میانجی ءَ سلاہ‌بندیں مردمانی تیرگواری ئے دپ ءَ کپتگ. رَسانک ءِ ھال سرکنوکانی رِد ءَ، مهدی جمشیدی تاریک 27 ھرداد ماہ ءَ ماں پاریاب ءِ پشموکی دمگ ءَ په بلوچیں جنیں آدمانی لٹ ءُ شاپ ءَ بهر زورتگ. اے ویل ءَ بازیں بلوچیں جنین آدمے لٹ ءُ شاپ ءُ دزگیر کنگ بوتگ.

پیشترا ماں تاریک 17 مهر ماہ ءَ ھم «مهمد بامری»، پاریاب ءِ اِنساپ ادارھئے کارمسترا گوشتگ: که مهدی جمشیدی ئے سرا تیرگواری ئے پرمندھئے دیما ھپت مردم دزگیر کنگ بوتگ، که اے میان ءَ سئے مردم چه وت دل ءَ، وتا اِنساپ ادارھئے دست ءَ داتگ.

اے بلوچ ھماں وھدا کُشگ بوتگ که جمے روچ 17 مهر ماہ 1405 ءَ دزاپ ءِ زیارت چمّگ ئے راه ءَ رَند چه نزامی ٹولییے تیرگواری ءُ نزامیانی کاروانے راہ سرا بمب ئے تراک ءَ «ابدالله کمبرزھی»، رھگوزیں بلوچے چه امنیتی ٹولییے تیرگواری ءَ کُشگ بوتگ. آییئے سیادان ءَ گوَشتگ: ابدالله ءَ ھچ پئیمیں جوڑشتے گوں اے ٹکّر ءَ نه بوتگ. گوں اے جاور ءَ سرکاری میڈیا ءَ آیی ماں تراک ءَ ھوریں مردمے زانتگ، که اے تراک ءَ نزامی کارمند کُشگ بوتگ اَنت. آییئے سیادان ءَ اے داواہ یکسر رَد کرتگ.