شستون ئے جهادآباد ءَ سلاہ‌بندیں ٹکّر آسر بوتگ؛ پنچ سلاہ‌بندیں مردم ءُ یک امنیتی کارمندے کُشگ بوتگ ءُ ٹکّر ئے جاگه ءَ لوگے مان داشتگ

رَسانک نیوز/ چارشمبے 1 مهر ماہ 1405، شستون ئے جهادآباد (ڈاب) ءَ نزامی، امنیتی ٹولی ءُ سلاہ‌بندیں مردمانی میان ءَ سلاہ‌بندیں ٹکّر چه ساھت 14:10 ئے وھدا بُنگیج ءُ کِساس سئے ساھت ءَ رَند سرجم بوتگ. سرکاری میڈیا ءُ سپاه ءِ زمینی لشکر ئے کُدس بُنجاه ئے مهلوکئے چِستو ائیرانی بهر ءَ گوَشتگ: اے ٹکّر ءَ پنچ سلاہ‌بندیں مردم ءُ یک نزامی کارمندے کُشگ بوتگ. ھمے وھدا امنیتی ٹولی ءَ شوشتری 8 روڈ ءَ ھماں لوگ که چه اُوداں ٹکّر زورگ بوتگ لمبینتگ ءُ مان داشتگ.

رَسانک ءِ ھال سرکنوکانی رِد ءَ، امنیتی ٹولی رَند چه اے لوگئے چاربند ءَ یک لودری جاھا سرکرتگ ءُ لوگ اِش لمبینتگ. رَند اشیا امنیتی ٹولی ءَ ٹیل ریهتگ ءُ لوگ مان داشتگ. اے کارواییے وھدا چه ٹکّر ئے جاھا زوریں تیرگواری ءُ تراکے توار اِشکنگ بوتگ.

ٹکّر ئے سرجم بوھگ ءَ رَند، شستون ءُ جهادآباد دمگئے راھاں امنیتی جاور تُرند کنگ بوتگ اَنت ءُ امنیتی ءُ ساده پوشیں ٹولییے کارمند ھَمُک جاگها اُوشتاتگ اَنت. ھمے پئیم بازیں جاگهاں چیک پوسٹ لِک کنگ بوتگ اَنت ءُ جهمنندانی روگ ءُ آھگ چارگ بوھگ اِنت.

سپاه ءِ زمینی لشکر ئے کُدس بُنجاه ءَ گوشتگ: اے کارواییا سپاہ، چیریں ادارہ ءُ پراجا ٹولی ھور بوتگ اَنت ءُ پنچ سلاہ‌بندیں مردم کُشگ ءُ لهتیں دزگیر کنگ بوتگ. اے اداره ءَ ھمے وڑا گوشتگ: ماں اے ٹکّر ءَ امنیتی کارمندے ھم کُشگ بوتگ ءُ چه ٹکّر ئے جاھا سلاہ ءُ جنگی ساز ءُ سامان دست کپتگ.