شستون ئے بکشان ءَ نزامی ٹولییا گوں ٹکّر ءَ کُشگ بوتگیں چار بلوچئے پجّار زانگ بوتگ

رَسانک نیوز/ جمے 27 شهریور ماہ 1405، راجی پدائیانی سنگر ئے چار پدائی که شمبے روچ 21 شهریور ماہ ءَ شستون ئے بکشان ءَ گوں نزامی ٹولییا نُه ساھت ءَ بُرز ٹکّر ءَ کُشگ بوتگ اَنت آیانی پجّار زانگ بوتگ.

رَسانک ءَ اے بلوچانی پجار «مهمد دھکان‌ھلد»، نزیر ئے چُک ءُ سوران ئے نندوک؛ «مبین شادزھی»، ایوب ئے چُک؛ «سلیم مزارزھی»، ابدلازیز (ابداللّه) ئے چُک ءُ «موسا دھواری»، ھر سئے شستون ئے نندوک زانتگ.

اے ٹکّر شمبے روچ ءَ بکشان ءَ چه بانگواه ءِ ساھت چار ئے وھدا بنگیج بوتگ ءُ رَند چه نُه ساھت ءَ گیش پد چه زوریں تیرگواری ءُ تراکاں آسر بوتگ. اے ٹکّر ءَ امنیتی ءُ نزامی ٹولییا ٹکّر ئے جاگهئے راه بستگ اَنت ءُ کمکی ٹولی گوں آمبولانس ءَ جاھا دیم دیئگ بوتگ اَنت.

سپاه ئے زمینی لشکر ئے کُدس بُنجاه ءَ ماں جار تاکے که سرکاری میڈیا ءَ شنگ کرتگ داواھی کرتگ اے ٹکّر ءَ یک سلاہ‌بندین گل ئے پنچ پدائی کُشگ ءُ ھمے وڑا سپاه ءِ سئے کارمند ھم جَنَگ بوتگ. پیشترا رَسانک ءَ کُشگ بوتگیں دو نزامی کارمند ئے پجّار «میساک سانی» ءُ «مهدی سرھدی» ھمے وڑا «مسلم پازلی» سپاھئے بسیجئے کارندگ گوشتگ.

آدگه نیمگا، راجی پدائیانی سنگر ءَ گوشتگ سرکار ئے ٹولییا بکشان ءَ اے گل ئے بُنجاھییے سرا اُرش کرتگ که اے گل ءَ په وتی پدائیانی رکّینگ ءَ پنچ کمک سرکنوکیں ٹیم جاھا روان داتگ. راجی پدائیانی گل ءَ گوشتگ که شش پدائی په چاربند ئے پروش ءُ چه ٹکّر ئے جاھا ڈن بوھگ ءَ سوبین بوتگ اَنت ءُ چار پدائی ماں اے ٹکّر ءَ کُشگ بوتگ. اے گل ءَ سرکاری ٹولییے ٹپّیگ بوتگیں کارمندانی کچّ ءَ 21 نپر ءُ کُشگ بوتگیں کارندگانی کچّ 9 نپر گوَشتگ.