دُزاپ ءَ بلوچے که سلاہ‌بندین ءُ پجّار نه بوتگیں مردمان ءَ آوار جتگ، پد چه 22 روچ ءَ آجو بوتگ

رَسانک نیوز/ 25 شهریور ماہ 1405 ءِ بانگواہ ءَ، دزاپ ءَ بلوچے که سُہنار ئے دکان ءَ کارا بوتگ ءُ، 3 شهریور ماہ ءَ سلاہ‌بندین ءُ پَجّار نه بوتگیں مردمان ءَ چه بزرگمهر روڈ ءَ آییئے لوگئے نزّیک ءَ آوار جتگ، گوں کماش ءُ بابهروسهیں مردُمانی رَندگیری ءَ، 22 روچ ءَ پد آجو بوتگ ءُ وتی لوگ ءَ پدترّتگ.

رَسانک ءَ اے بلوچئے پجّار «مسئود شاھوزھی»، 34 سالگ، گپور ئے چُک، آروس کرتگ ءُ یک زھگئے پت، دزاپ ءِ نندوک زانتگ.

رَسانک ءِ ھال سرکنوکانی رِد ءَ، مسئود چه دزاپ بازار ئے سُہناراں بوتگ، ھماں وھدا که وتی لوگ ئے نزّیک ءَ روڈیا گاڑی ءَ گوں روگ ءَ بوتگ نُگرہ رنگیں پژو گاڑی ئے نندوکاں آییئے پدا کپتگ اَنت. نگرہ رنگیں پژو گاڑییے نندوکان ءَ چه پدئیں نیمگ ءَ مسئود ئے گاڑی ٹوکر جتگ ءُ پد چه اشیا که مسئود وتی گاڑی ءَ داشتگ آیان ءَ پدا چه دیمیں نیمگ ءَ مسئود ئے گاڑی ٹوکر جتگ.

ھال سرکنوکان ءَ پیشترا گوَشتگ: اے ٹوکر ءَ رَند مسئود چه وتی گاڑی ءَ ائیر کپتگ ءُ ھمے وھدا لهتیں چه پژو گاڑییے نندوکاں ھم چه گاڑی ءَ ڈنّ بوتگ اَنت، آیان ءَ زور ئے سرا مسئود وتی گاڑی ءَ سوار کرتگ ءُ چه جاھا دَر شُتگ اَنت.

آییئے آجو بوھگئے وڑ ءُ پئیمئے بارئوا گیشیں ھالے دست نه کپتگ ءُ نه که آییئے جاورانی رَندگیری کنوکیں کماش ءُ بابهروسهیں مردمان ءَ اے بارئوا گیشتریں ھالے گوَشتگ.