رَسانک نیوز/ دوشی 22 شهریور ماہ 1405 ءِ شپ ءَ، راسک ءِ پیشن ءَ سلاہبندین ءُ بے پجّاریں مردمانی تیرگواری ءَ گوں سئے بلوچ کُشگ بوتگ. اے تیرگواری ءَ، دو برات ھوری ءَ گوں دگه سنگتے، ھر سئے بلوچ چه کارا دیم په لوگ ءَ پدترّگ ءَ بوتگ اَنت که تیرانی دپ ءَ کپتگ ءُ ساھش داتگ.
رَسانک ءَ کُشگ بوتگیں بلوچانی پجّار «اُمر نبورہ»، «پئیزمهمد نبورہ»، ھر دو جانمهمد ئے چُک، پیشن ئے نندوک، «ابدلرسول بلوچ»، ایوب ئے چُک روچ درآتکیں بلوچستان ءَ ملانٹ ئے نندوک ءُ پیشن ئے جهمنند زانتگ.
رَسانک ءِ ھال سرکنوکانی رِد ءَ، ساھت 23 ئے وھدا سلاہبندیں مردماں که دو پٹ پٹیا سوار بوتگ اَنت ھما وھدا که آیاں وتی دکان بستگ ءُ لوگ ءَ روگ ءَ بوتگ اَنت آیانی سرا تیرگواریش کرتگ. اے تیرگواری ءَ ھر سئے بلوچ ءَ تیر وارتگ ءُ ساہ داتگ.
ھال سرکنوکان ءَ گوَشتگ: ابدلرسول ءِ پت پد چه جلاوتنی ءُ ماں پیشن ءَ جهمنند بوھگ ءَ، کِساس سئے سال پیسرا پیشن ءَ سلاہبندین ءُ پَجّار نه بوتگیں مردمانی تیرگواری ئے دپ ءَ کپتگ ءُ ساھی داتگ.
داں انگتا سلاہبندیں مردمانی پجّار ءُ آیانی سئوب زانگ نه بوتگ.
Be the first to comment