هامون ءَ سلاہ‌بندین ءُ پَجّار نه بوتگیں مردمان، لوگئے سرا اُرش ءَ بلوچے کُشگ بوتگ

رَسانک نیوز/ شمبے 14 شهریور ماہ 1405، ھامون ءَ لوتک ئے ورمال دمگ ءَ بلوچییے لوگئے سرا سلاہ‌بندین ءُ پَجّار نه بوتگیں مردمان ءَ اُرش ءَ رَند آییئے گردن ئے شهرگ بُرّتگ ءُ ماں سر ءَ تیر جتگ ءُ کُشتگ.

اے بلوچئے پجّار «منسور براھویی (زیرکاری)»، 29 سالگ، امیر ئے چُک، آروس کرتگ ءُ ھامون ئے ورمال دمگئے نندوک زانگ بوتگ.

رَسانک ءِ ھال سرکنوکانی رِد ءَ، بانگواہ ئے ساھت 3 ئے وھدا چُنت سلاہ‌بندین ءُ پَجّار نه بوتگیں مردمان ءَ منسور ئے لوگ ءَ دَور اِش کُرتگ ءُ پد چه اشیا که آیان ءَ منسور ئے گردن ئے شهرگ بُرّتگ گوں وتاس ءَ آییا ماں سرا تیرِش جتگ ءُ کارواییا رَند چه جاھا دَر شُتگ اَنت. منسور براھویی ءَ ماں اے اُرش ءَ ساہ داتگ.

اے بلوچئے سیادان ءَ گوَشتگ: پیش چه اشیا، آییا ھچ وڑیں مالی یانکہ زاتی جیڑھی گوں کسی ءَ نه بوتگ ءُ داں انگتا جنوکانی پجّار ءُ آیانی سئوب چه اُرش ءَ زانگ نه بوتگ، گیشتریں ھالے اے بارئوا دست نه کپتگ.