کرمان ئے بندیگجاہ ءَ بلوچیں بندیگے چہ ڈاکٹرانی دلگوشئے کمی ءَ ساہ داتگ

رَسانک نیوز/ یکشمبے روچ 8 شهریور ماہ 1405، کرمان ءِ بندیگجاہ ءَ بلوچیں بندیگے کہ آییئے پجّار «جُما نارویی»، 35 سالگ، شهباز ئے چُک، آروس کرتگ ءُ پنچ زھگئے پت، دُزاپ ءِ نندوک زانگ بوتگ. رَند چہ اشیا کہ ماں ھوریں واڈ ءَ دل ءَ گِپتگ، چہ ڈاکٹرانی دلگوشئے کمی ءُ وھد ئے سرا درمانجاہ ءَ سر نہ بوھگ ءَ ساھی داتگ.

اے ھالئے رِد ءَ، جما نارویی چہ سال 1403 ءَ کرمان ئے بندیگجاہ ءَ پہ مواد ءَ گوں جُڑتگیں پرمندھئے دیما بندیگ بوتگ ءُ داں انگتا آییا اَلّمیں ھُکمی دیئگ نہ بوتگ.

ھاندانئے نزّیکیں ھال سرکنوکان ءَ گوَشتگ: انّیگیں وھدا آییئے زمانتئے سرا آجو کنگئے گپّ منّگ ءُ کرار بوتگ دو سال بندیگ بوھگ ءَ رَند زمانت ءِ سرا چہ زندان ءَ آجو ببیت. آییئے ھاندان ءَ لوٹتگ آجو بوھگ ءَ رَند آییئے درمان ءَ ڈنّ چہ زندان ءَ بکننت. گوں اے جاور ءَ جُما نارویی ءَ ماں بندیگجاھئے ھوریں واڈ ءَ دل ءَ گپتگ ءُ پہ درمان ءَ زندانئے درمانجاہ ءَ شور دیئگ بوتگ کہ ھموداں ساھی داتگ. ھاندان ئے نزّیکیں ھال سرکنوکان ءَ گوَشتگ: آییئے سرا ڈاکٹرانی دلگوشئے کمی ءُ وھد ئے سرا درمان نہ بوھگ، ھالت ئے نگیگ کنگئے سئوب بوتگ اَنت.

گوَشنت اے بندیگ ءَ دل ءِ نادُراھییے گوَست بوتگ ءُ انّیگیں ماھان ءَ دل ءِ ناجوڑیا سکّ ءَ تورینتگ. بلہ سربوتگیں ھالانی رِد ءَ، آییئے درمان ءُ ڈاکٹرانی دلگوش دیئگ وھد ئے سرا نہ بوتگ ءُ کرار بوتگ آجو بوھگ ءَ رَند ڈنّ چہ زندان ءَ آییئے درمان ءَ دیما ببر اَنت.