رَسانک نیوز/ شمبے روچ 7 شهریور ماہ 1405، واش ءَ بلوچیا پد چہ اشیا کہ انتزامی ٹولییا دزگیر کرتگ ساھی داتگ. ھاندانئے نزّیکیں ھال سرکنوکان ءَ گوَشتگ: پد چہ اشیا کہ آیی جُست پرس کنوکیں پلیسئے دارگجاہ ءَ شور دیئگ بوتگ، لٹّ شاپ ءُ آزار دیئگ ءَ رَند کہ لٹّانی رَد ءُ نشان آییئے جونئے سرا ایئر بوتگ اَنت ساھی داتگ.
رَسانک ءَ اے بلوچئے پجّار «انور شهلیبُر»، (شهنوازی)، بائیان ئے چُک، 40 سالگ ءُ واشئے نندوک زانتگ.
انور ئے سیادانی رِد ءَ، انور پہ کاریا وتی لوگئے بان ءَ سر کپتگ ءُ ھمے وھدا ھمسایگئے لوگا دُزّییے بوتگ. ھمسایگ ءَ انور کہ بان ئے سرا دیستگ دُزّییے بُهتان ءَ انور ئے سرا جتگ ءُ اے پئیما آیانی میان ءَ دپ جنگی بوتگ. پد چہ اشیا کہ ھمسایگ ءَ پلیس لوٹاینتگ، پلیس ءَ انور دزگیر کرتگ ءُ جُست پرس کنوکیں ادارھئے دارگجاہ ءَ شور داتگ.
انور ئے ھاندان ئے نزّیکیں ھال سرکنوکان ءَ گوَشتگ: جُست پُرس کنوکیں ادارہ ءَ پہ انور ئے منّینگ ءَ آیی باز لٹّ ءُ شاپ کرتگ. اے ھال سرکنوکانی رِد ءَ، ٹپّانی شونزیں پد ءُ نشان آییئے جونئے سرا درا بوتگ اَنت ءُ گُڑسرا ماں دارگجاہ ءَ ساھی داتگ.
اے ھال سرکنوکان ءَ گوَشتگ: انور ئے مرک ءَ رَند جُست پرس کنوکیں ادارھئے ٹولی ءَ آییئے بے ساھیں جون واشئے نادارہجاہ ئے اورژانسئے دیما یلہ کرتگ ءُ چہ اُداں شُتگ اَنت. گوں اشیا کہ آیی چہ پیسرا ماں ھمے ٹولییے دارگجاہ ءَ بوتگ.
Be the first to comment