پهرہ ءَ سئے بلوچیں جنیں آدم لٹّ شاپ ءُ دزگیر بوتگ؛ یکے چہ دزگیر بوتگیں جنیں آدماں رَند چہ یک روچ ءَ آجو بوتگ

رَسانک نیوز/ جمے روچ 6 شهریور ماہ 1405، پهرہ ئے گریب آباد دمگئے رازی روڈ ءَ امنیتی ءُ انتزامی ٹولی گوں سادہ پوشیں ٹولییے ھوری ءَ پُرّیگیں لوگئے سرا اُرش ءُ سئے بلوچیں جنیں آدمان ءَ لٹّ شاپ ءَ رَند دزگیر کرتگ ءُ چئیریں جاگهی برتگ، یکے چہ دزگیر بوتگیں جنیں آدماں پد چہ یک روچ ءَ آجو بوتگ.

ھال وشّئے ھالانی رِد ءَ، امنیتی ءُ انتزامی ٹولی نیمروچئے ساھت 14 ءِ وھدا پہ اے ھاندانئے یک بچکئے دزگیر کنگ ءَ کہ زاتی داواھدار آییئے سرا اُوشتوک ءُ پلیس آییئے پدا بوتگ، ھمے لوگا تها بوتگ اَنت ءُ لوگئے مردمان ءَ تُهمت اِش جَتگ کہ شما آییا چئیر داتگ. کارواییا بهر زورتگیں ٹولییا لوگئے جنیں آدمان ءَ آیانی چُکّانی دیما بد رَدءُ لٹّ شاپ کرتگ. لٹّ ءُ کُٹّ ئے وھدا «شیما بامری» ئے سر سکّ ءَ ٹپّیگ بوتگ ءُ گُمان اِنت کہ پُروشتگ، سائمہ ءُ ستایش بامری ئے دیم شونز ترّتگ اَنت ءُ ٹپّیگ اَنت.

پد چہ اے جنیں آدمانی دزگیر بوھگ ءَ آیانی لوگئے مردم ءُ سیاد پہ رَندگیری ءَ امنیتی ادارھان ءَ شُتگ اَنت بلہ آیان ءَ اے پسّو دیئگ بوتگ کہ اے جنیں آدماں پہ «سرکار ئے مردمانی بد رَد کنگ ءُ دُژمان دیئگ ءَ»، دزگیر کنگ بوتگ اَنت. ھال سرکنوکانی رِد ءَ، دپّ جنگی ھماں وھدا پیش آتکگ کہ نزامی ٹولییا لوگئے جنیں آدمان ءَ دُژمان داتگ ءُ پہ آیاں سِلّیں لبز کار بستگ.

گوَشگ لوٹیت شمبے 7 شهریور ماہ ءِ بیگاہ ءَ نوک ورنائیں «ستایش بامری» پد چہ یک روچ ءَ آجو بوتگ، بلہ لٹّ شاپئے پَد ءُ نشان ماں آییئے دیمئے سرا گِندگ بوتگ. گوں اشیا کہ ستایش بامری آجو بوتگ بلہ اے ھاندانئے دو دگہ گوہار شیما ءُ سائمہ بامری داں انگتا بندیگ اَنت ءُ آیانی پرمندھئے جاور ءُ دارگئے جاگهئے بارئوا ھالے دست نہ کپتگ.

گوَشنت اِشی دومی رَند اِنت کہ نزامی ٹولی پہ اے مردئے گِرَگ ءَ ھمے لوگئے سرا اُرش کنگ اِنت. آییئے پرمندھئے بارئوا گیشتریں ھالے دست نہ کپتگ ءُ شیما ءُ سائمہ بامری ئے لوگئے مردمانی رَندگیری پہ آیانی ھالے سرپد ئے زانگا داں انگت برجاہ اِنت.