گِه ءَ نزامی ٹولییے تیرگواری ءَ دو بلوچ کُشگ بوتگ

رَسانک نیوز/ سئے شمبے روچ 3 شهریور ماہ 1405، گِه ئے راھانی پلیسئے جاگه ءَ، پراجا ٹولییے زاتی گاڑییے سرا تیرگواری ءَ دو بلوچ ءَ تیر وارتگ ءُ ساہ داتگ.

رَسانک ءَ اے دو بلوچئے پجّار «ھُسین ھالکدادی»، 26سالگ، انور ئے چُک، آروس کرتگ ءُ یک زھگئے پت، بمپور ئے نندوک ءُ «ھسین شهنوازی»، 28 سالگ، آروس کرتگ ءُ دو زھگئے پت، واشئے نندوک ءُ پهرہ ئے ریکپوت دمگئے جهمنند زانتگ.

رَسانک ءِ ھال سرکنوکانی رِد ءَ، گِه ئے راھانی پلیسئے جاگه ءَ ھماں وھدا که اے دویں بلوچ وتی زاتی گاڑی ءَ گوں روگ ءَ بوتگ اَنت نزامی ٹولییے کمین ءَ کپتگ اَنت ءُ پراجا ئے چُنت گاڑیانی ٹولییا آیانی گاڑیئے سرا تیرگواری کرتگ. اے تیرگواری ءَ گاڑیئے نندوکان ءَ تیر وارتگ ءُ ساہ داتگ.

ھمے تَچکیا، پلیسئے جارکشّ ءَ داواہ کرتگ کہ سوبهئے زِرباریں دمگاں سلاہ بندیں دُزّیانی گیش بوھگ ءَ رَند پلیس ءَ سلاہ بندیں دُزّانی یک ٹولییا پجّاہ آرتگ ءُ ھماں وھدا کہ دُزّتگیں گاڑیان ءَ گِه ءَ سرکنگ ءَ بوتگ اَنت گوں آیاں ٹکّرے زورتگ. پلیسئے سرکاری رپوٹ ئے رِد ءَ، اے ٹکّر ءَ دو مردم کُشگ بوتگ ءُ انتزامی ٹولی ءَ دُزّتگیں یک پژو 405گاڑی، یک پژو پارس گاڑی ءُ یک وتاسی گوں ساز ءُ سامان ءَ چہ دُزّاں دست کپتگ.

بله داں انگتا ھچ پئیمیں تَچکیں سبوتی که اے دویں بلوچانی سلاہ بندیں دُزّ یانکه دُزّانی گلیا ھور بوھگئے تسدیک ءَ بکنت، دست نکپتگ.