رَسانک نیوز/ چارشمبے 28 مرداد ماہ 1405 ءِ بانگواہ ءَ، دُزاپ ءُ زابلئے راہ ءَ دُزاپ ءَ ڈنّ بوھگئے راھئے چیک پوسٹ ءَ سادہ پوشیں امنیتی ٹولییے تیرگواری ءَ بلوچی ماں سرین ءَ تیر وارتگ ءُ سکّ ءَ ٹپّیگ بوتگ.
اے بلوچئے پجّار «یونس رکشانی»، ابدلرھمان ئے چُک، دُزاپ ءِ نندوک زانگ بوتگ.
اے ھالئے رِد ءَ، ویل بانگواہ ءِ ساھت 2:20 ءِ وھدا پیش آتکگ ءُ یونس کہ سواری گاڑیئے ڈریور بوتگ، وتی چار سیاد ئے ھوری ءَ دیم پہ زابل ءَ ھمراھییے درمان ءَ روگ ءَ بوتگ، کہ چیک پوسٹئے سرا اُوشتوکیں سادہ پوشیں امنیتی ٹولییا آییئے گاڑیئے سرا تیرگواری کرتگ ءُ گاڑیئے راہ بستگ ءُ گاڑی داشتگ.
اے تیرگواری ءَ یک تیری یونس رکشانی ءَ ماں سرین ءَ لگّتگ ءُ ٹپّیگ بوھگ ءَ رَند دُزاپ ءِ ھاتمالانبیاء نادراہجاہ ءَ سرکنگ بوتگ کہ داں اے وھدا بستری اِنت ءُ درمان بوھگ اِنت. گاڑیئے آ دگہ چار نندوک ءَ اے ویل ءَ نُکسی نہ بوتگ.
داں انگتا اے ویلئے بارئوا گیشتریں ھالی دست نہ کپتگ ءُ نہ کہ ویلئے پُژدر زانگ بوتگ.
Be the first to comment