بندراَبّاس ءَ بلوچیں ٹیلکشّئے بے ھالے سرپد ئے کہ نزامی ٹولییا پہ ھژم ءَ دزگیر کرتگ چار روچ اِنت برجاہ اِنت

رَسانک نیوز/ یکشمبے 25 مرداد ماہ 1405، بندراَبّاس ءَ تاریک 22 مرداد ماہ ءَ بلوچیں ٹیلکشّی کہ سادہ پوشیں امنیتی ٹولی ءَ پہ ھژم ءَ دزگیر کرتگ چار روچ ءَ رَند داں انگت ءَ آییئے بے ھالے سرپد ئے برجاہ اِنت. لوگئے مردمان ءَ ھچ پئیمیں ھالی چہ آییا دست نہ کپتگ.

اے بلوچ «ابدلرھیم نارویی (مرہ ای)»، کِساس 35 سالگ، آروس کرتگ ءُ زھگانی پت، دُزاپ ءِ نندوک زانگ بوتگ.

اے ھالئے رِد ءَ، بندراَبّاس ءِ نزّیک ءَ سادہ پوشیں امنیتی ٹولی کہ تیبا گاڑی ءَ سوار بوتگ اَنت اے بلوچئے گاڑیئے سرا تیرگواریش کرتگ، پد چہ اشیا کہ گاڑی ئے تایراں تیر لگّتگ، گاڑیئے دارگ ءَ رَند ابدلرھیم ءُ آییئے ھمراہ ءَ لٹ ءُ شاپ اِش کرتگ. دیمترا آ دگہ مردم آجو بوتگ ءُ ابدلرھیم ءَ بید چہ سرکار ئے ھُکم ءَ دزگیر کرتگ ءُ چئیریں جاگهی بُرتگ.

دزگیر بوھگ ءَ رَند لوگئے مردمان ءَ ابدلرھیم ئے ھالے سرپد ئے دست نہ کپتگ ءُ نہ اے گپّ زانگ بوتگ کہ کجام ادارہ ءَ دزگیر کرتگ. آییئے سرا بستگیں الزام ءُ تُهمت ھم داں اے وھدا زانگ نہ بوتگ.