رَسانک نیوز/ سئے شمبے 13 مرداد ماہ 1405، پهرہ ءَ بلوچی سلاہ بندیں دُزّانی تیرگواری ئے دپ ءَ کپتگ ءُ چہ بازیں ٹپّاں ساھی داتگ۔ پد چہ تیرگواری ءَ دُزّان ءَ آییئے گاڑی دُزّتگ ءُ چہ جاھا دَر شُتگ اَنت.
رَسانک ءَ اے بلوچئے پجّار «مهمد ربوشہ»، رستم ئے چُک، بزمان ئے نندوک، پهرہ ئے پیسریگیں نمایندگ نورمهمد ربوشہ ئے برات زانتگ.
رَسانک ءِ ھال سرکنوکانی رِد ءَ، مهمد ربوشہ مُساپر کشّیئے کار ءَ دلگوش بوتگ، پهرہ ءَ مُساپر سوار کنگئے جاگهیا سلاہ بندیں دُزّانی تیرگواریئے دپ ءَ کپتگ۔ آییا تیر وارتگ ءُ جاھا ساھی داتگ، سلاہ بندیں دُزّان ءَ گاڑییے دُزّگ ءَ رَند چہ جاھا در شُتگ اَنت.
گوَستگیں ماھان ءَ، ماں بلوچستان ءَ پهرہ پہ ایمنییے لهازا یکی چہ ناامنتریں شهراں زانگ بیت۔ ھمیں وڑا مهلوکئے آوار جنگ، کوش، سلاہ بندین ءُ بے پجّاریں مردمانی کارواییئے گیش بوھگ ءُ تیرگواری ئے ویل ءُ واکانی گیشتر بوھگ ءَ شهر ئے جهمنندانی جانی ءُ مالی امنیت ءَ بیهار کرتگ۔ اے پئیمیں ویلانی پد ماں پدا بوھگ ءُ آیانی دیم دارگئے ھاترا، زمهوارانی سئوب داریں گامگیجئے نہ زورگ جهمنندانی دل پریشانی پہ ایمنی ئے بُن گپّ ءَ گیش کرتگ.
Be the first to comment