پردوس ءُ تایباد ئے بندیگجاھان ءَ دو بلوچیں بندیگئے ھوری ءَ، شش بندیگ پاھو دیئگ بوتگ

رَسانک نیوز/ دوشمبے ءُ چارشمبے 5 ءُ 7 مرداد ماہ 1405 ءَ، پردوس ءُ تایباد ئے بندیگجاھان ءَ سیستان ءُ بلوچستان ئے نندوکیں دو بندیگئے ھوریا شش بندیگ کہ پیسرترا پہ مواد ئے الزاما پاھو ئے ھُکمش وارتگ، پاھو دیئگ بوتگ.

پردوس ئے بندیگجاھا پاھو دیئگ بوتگیں بندیگئے پجّار «اسهاک مرہ‌ای»، سَپَر ئے چُک، آروس کرتگ ءُ پنچ زھگئے پت، سرھس ئے سنگر دمگئے نندوک زانگ بوتگ ءُ تایباد ئے بندیگجاہ ءَ پاھو دیئگ بوتگیں بندیگئے پجّار «نادر آبیل»، کِساس 40 سالگ، زاھر ھان ئے چُک، آروس کرتگ، چار جنیں چُکّئے پت، مشهد ئے جهمنند ءُ ھر دو سیستان ءُ بلوچستان ئے نندوک زانگ بوتگ اَنت.

رَسانک ءِ ھال سرکنوکانی رِد ءَ، اسهاک سال 1399 بیرجند ئے راھا ھماں وھدا کہ تریلیئے ڈریور بوتگ دزگیر کنگ بوتگ ءُ گُڑسرا پہ مواد ئے الزاما چہ انکلاب آمیدگِس ءَ پاھو ئے ھُکمی وارتگ۔ لوگئے مردماں پہ گُڑسریں گندوک ءَ سئوبیں بوتگ اَنت۔ آییئے پاھو ئے ھکمئے سرا 5 مرداد ماہ ءَ کاروایی بوتگ.

ھمیں وڑا، ھال وشّئے ھالانی رِد ءَ، تایباد ئے بندیگجاہ ءَ ھم چُنت اوگان باشندگئے ھوری ءَ کہ آیانی پجّار زانگ نہ بوتگ پنچ بندیگ کہ یکی چہ آیاں بلوچی اِنت پاھو دیئگ بوتگ ءُ «نادر آبیل»، یکشمبے روچ ءَ 4 مرداد ماہ ءَ اُوگان باشندگانی ھوریا چہ مشهد ئے وکیل آباد بندیگجاھا پہ تایباد ئے بندیگجاھا شور دیئگ بوتگ ءُ پد لوگئے مردمانی چہ گُڑسریں دیدارا، آییئے پاھو ئے ھُکمئے سرا 7 مرداد ماہ ءَ کاروایی بوتگ.

گوَشنت نادر چُنت سال پیسرا گوں موادا جُڑتگیں پرمندھئے دیما دزگیر کنگ بوتگ ءُ پد چہ اشیا کہ آییئے ھم پرمندہ ءُ ھم جرمیں بندیگ، پاھو دیئگ بوتگ اَنت، آیی بے گناہ زانگ ءُ آجو بوتگ۔ گوں اے جاوراں کِساس یک سال ءَ پیش نزامی ٹولییا آیئے لوگئے سرا اُرش ءُ یک بری پدا دزگیرش کرتگ ءُ پہ ھماں پرمندھئے ھاترا کہ یک بری چہ آ پرمندہ ءَ چُٹّتگ، دومی برا دزگیر کنگ ءَ رَند آھر سرا آییئے پاھو ئے ھکمئے سرا کاروایی کنگ بوتگ.